ලංකාවට පිටසක්වල ජීවීන් ආ පසු !

සමකාසන්නයේ රටකට පාත් වේයැයි කාළගුණෙන් උපකල්පන කර තිබූ උල්කාපාත වැස්ස අපේ බෝඩිමේ වහලයටම කඩාපාත්වීම, බෝඩිම්වාසී අප තිදෙනාම ප්‍රකම්පනයට පත් කරවන සුළු කාරණාවක් විය. කැම්පස් එකේ සාමකාමී උද්ගෝෂනයකදී මෙන් තිදෙනාටම කිසිඳු හානියක් සිදු නොවූවත්, 2024 දි බෑන් වීමට තිබූ ඇස්බැස්ටෝස් වහළය 2017දීම බෑන් වීම හේතුකොටගෙන අපද මේ බෝඩිමෙන් බෑන් වීමේ සාදාරණ අවදානමක් මතුවිය.

"මොකක්ද බන් ඒ උනේ?" ඒ ඇක්මන්ය

ඇසෙන ඇසෙන හැම ප්‍රශ්නයකටම උත්තර දීමට අනිත් අය බැඳී නොමැති බැවින්, මමත් ජුවානිසුත්, ඇක්මන්ගේ වදන් නොතකා ගෙතුළ පරීක්ෂා කිරීම ආරම්භ කළෙමු. ඒ උල්කාපාත වැස්සක් නොව පොදයක් පමණක් බව මම නිගමනය කළේ කුඩා කුඩා පාෂාණ කැබලි දැකීමත් සමඟය.එහෙත් ඇඳ යට තිබී හමුවූ ටෙනිස් බෝලයක් තරමේ නීල පීත වර්ණයෙන් බබළන ගෝලාකාර වස්තුව දෙස නෙත් සිත් සහ කට ඇදී ගියේ අපේ ළමා මානසිකත්වය නිසා නොව, මාස දෙක තුනක හිඟ බෝඩින් පීස් මෙන්ම නියතයෙන්ම කරපිට වැටෙන වහළයේ අලාබයද කවර් කිරීමට බෝඩිමේ ඇන්ටියාට මේ බෝලය බැස්සිය හැකි බව මතක් වූ හෙයිනි.
එම බෝල බැස්සීමේ යෝජනාව දෙවන වර කියවීමේදී සභාවට බාධා ඇතිවූයේ සෙංකෝලය නැති වීමෙන් නොව, ඉහළ ආකාශයෙන් ඇසුනු ABS නැති පරණ වාහනයක් බ්‍රේක් ගසන්නාක් වැනි  ශබ්දයක් නිසාය.උල්කාපාත වැස්සත් සමඟම වෙන ඕනෑම දේකට මුහුණ දීමට අවශ්‍ය "ගොන් මොරාල්" හෝමනය ග්‍රන්ථි වලින් එළියට පනිද්දී අපි වහළයේ දෙසට උඩ පැන්නෙමු.

ඒ පාර පිටසක්වල යානාවකි.නමුත් පීරිසියක ෂේප් එක නැත.
දැන් මේකනම් එපා වෙලා ! මොකෝ බන් එලාම් එක වදින්නෙ නැත්තෙ තාම? 

ඉහළින් ඉරාජ්ගේ ස්ටුඩියෝ එකේ මෙන් නානාප්‍රකාර ශබ්ද ඇසෙන්නට විය.මට සිතුණේ ඒලියන්ස්ලා අප සමඟ කොමියුනිකේට් කිරීමට හදන බවකි.එක් එක් නුහුරු නුපුරුදු භාෂාවලින් ඇසුනු කටහඬවලින් පසුව,

 "සින්හාලා...දාපන් දාපන් ඕක හරියයි"

යනුවෙන් එක් කටහඬක් ආ අතර වෙන එකෙක් ඇඩ්වල පෙන්නන ආකාරයට ලංකාවේ කම්පැනි වල තිබෙන භාෂාවෙන් අප ඇමතූහ.

"ආයුබෝවන් !!"

මෙය මනුස්ස වරිගයා සමඟ වෙනත් ලෝකයක් සමඟ සංහිඳියාවක් (සමාවන්න ) සම්බන්ධයක් ඇතිකරගත් මුල්ම අවස්ථාව විය යුතුය. නමුත් කවුරුත් මෙය විශ්වාස නොකරන බව විශ්වාසයෙන් කිව හැක්කේ , කියන්නේ මංජුලවත්, ආසිරිවත් නොවී “අපි “ වීමය.

දැන් ඒලියන් වදනට ප්‍රති උත්තරයක් දිය යුතුය."ආයුබෝවන්" ම කීමෙන් අපේ ඉමේජ් එක බසී.අපි ගොඩේයැයි ඒලියන්ලා වුවත් සිතනවාට අකමැත්තෙන් "වෙල් කම් ටූ ද ශ්‍රී ලන්කන්" කීමට මා සූදානම් වූ විටම වැඩිපුර ටී.වී බලන කටේ යහ පාලනයක් නැති ඇක්මන් හොට දැම්මේය.

"එලියන් අයියේ වතුර ටැංකිය උඩ ඇති"

අපේ ඉමේජ් එක හොඳටම බැස්ස අතර දැන් ලෝඩ් වෙන්නේත් නැත.

"නැත මිත්‍රවරුනි, අපි මීට බොහෝ දුරක සිට වේරම්භ වාතයෙන් කැළඹී ගියා වූ ජනාවාසයක සිට දුරු කතර ගෙවා පැමිණෙන්නෙමු.හදිසි ආක්‍රමණයක් හේතු කොටගෙන අප මාතෘ භූමිය බොහෝ සෙයින් විනාශ වූ හෙයින් ජනාවාසයට සුදුසු වෙනත් ග්‍රහලොවක් සොයා පැමිණියෙමු.ඔබ අත තිබෙන්නා වූ ගෝලාකාර වස්තුව අප ගමනේ මාර්ගෝපදේශාකයානෝය.එය අපට ජීවයට සුදුසු සශ්‍රීක මනරම් පෙදෙසක් කරා සැරිසරන්නේයැ" ඒලියන් අයියා සද්ධර්මාලංකාරය ඇසුරෙන් වදන් ගැළපුවේය.ඉන්පසු ට්‍රැක් මාරු විය " මෙපුර සෝබාව දේ සිරි විසිතුරු බලනු මිතුර !මට ආසයි නුඹත් එක්ක අපේ ගමට පියාඹන්න..."

"ඇයි අයියේ මේ බෝලෙ ආවෙ මෙහෙට.සාමාන්‍යයෙන් ඒලියන්ලා එන්නේ ඇමෙරිකාවටනෙ"

"අප ඒලියන්ලා නොවෙමු.ඒලියන්ලා නම් නුඹලාය”

"එහෙමයි කියලා ඔයාලත් මෙහෙ එන්න එපා අයියේ.අපිත් ඉන්නෙ හෙන අමාරුවෙන්.චීන්නුයි ,ඉන්දියන්කාරයොයි දැන් ඒලියන්ලා.අපිට ඉතින් එල්ලියන්ලා තමයි"

"අපටත් කළහැකි අනෙකක් නොමැත මිතුර.අප ඔබ දිවයිනෙහි පාලකයා සමඟ සාකච්ඡා පවත්වමු.එයින් ප්‍රතිපලයක් නොමැති වුවහොත් ආක්‍රමණයකට හෝ අප සූදනම්ය"

"එහෙම මේ එහෙන් මෙහෙන් පාත් වන්නා වු අයවලුන්ට සාකච්ඡා නොදේ. ඔබල මේ බෝඩිමේ වහළෙ බිඳ දමන නිමේශයේ...මේ මේ" ඇක්මන්  ඒලියන්ලාට යෑමට තැනක් සෙවුවේය.කොහ්වත් ඉඩ නැත හැමතැනම පිකට්යැ, උපවාසයැ

"මෙයාල කොහෙටද බන් අයිති? ආආ හ් විදේශ අමාත්‍යාංශෙ ..අන්න එහෙ යන්නකො.ගිහින් පිකට් එකක් කරන්නකෝ සාකච්ඡාවක් ගන්න"

ඔබලා උගත් බුද්ධිමත් ප්‍රයෝගික පිරිසක් බවට අපට පසක් වූවා.අපට වුවමනායි ඔබ සමඟ සාකච්ඡාවක් පැවැත්වීමට.අපි එන්නෙමු.නමුත් සැබෑ ස්වරූපයෙන් නොවේ"

විනාඩි දෙක තුනක ඇවෑමෙන් ඉහළ සිට පහළට, කැඩුනු වහළය තුළින් පහත් වූ රිදී පාට කූරක එල්ලී ආ ඒලියන් අයියලා තුන් දෙනා ඉතා ඉක්මනින් මෙහි වර්ගයා බෝකරනු ඇති බව අපට පසක් වූයේ, ඔවුන් ඇඳ සිටියේ ලංකාවේ ජාතික ඇඳුම නිසාත් ජාතික ඇඳුමට සරමක් අයිති නිසාත් අපි උඩ බලගෙන හිටි නිසාත්ය.

කිව්වා සේම ඒලියන් සෙට් එකේ පෙනුම මනුශ්‍ය වරිගයාට බොහෝ සමාන විය.ඔවුන් අත් දෙක එක්කොට ආයුබෝවන් කී අතර අපි තත්වය තබා ගැනීම පිණිස සේක් හෑන් කිරීමට උත්සහ කළෙමු.

"හොඳයි කවුද ඔබලාගේ නායකයා?"

මම ෆෝනයේ ගූගල් ඉමේජ් සර්චයක් කොට ජනාධිපතිතුමාගේ රූපයක් ගෙන ඒලියන් ලීඩර්ට පෙන්නුවෙමි.එකෙ ෆොටෝවක් බැලීමට පමණක් ෆෝනය දුන්විට එහෙට මෙහට පෙරළා අනිත් ෆෝටෝත් බැලීම ඒලියන්ලා අතරත් ඇති කැත පුරුද්දකි.ටිකෙන් ටික ඒලියන් මූණුවල මසල්ස් වෙනස් වී කැළඹිලි ස්වාභාවයක් ගත්තේය.ඔවුනොවුන් කුටු කුටු ගාමින් තම තමන්ගේ කැළඹීම විකාශය කළහ.

"අපි මෙතෙක් නොදැන සිටියෙමු. ඔබලාගේ නායකයාත් අපට සමානය"

අපි ඒ මතයට ඡන්දය ප්‍රකාශ කිරීමෙන් වැළකී සභාවෙන් පිටවී යාමට සැරසුනෙමු.

නැවතත් ඒලියන් අයියෙක් කට ඇරියේය.

"ඔහුටත් වෙස් මාරු කිරීමේ හැකියාව තිබෙනවා…විවිධාකර වේෂයන් විශ්මයජනකයි ! උත්කෘෂ්ඨයි !"

"හැබැයි මුහුණු එකමයි"

ශ්‍රී ලාංකිකයන්ගේ පොටෝසොප් හැකියාව ඒලියන්ලාවත් විශ්මිත කරවන සුළුය !!

"හැබැයි අපිට ලැබුණු තොරතුරු අනුව මේ රටෙහි මිනිස්සු ඉතාමත් ප්‍රීතියෙන් ඉන්නෙ"අපේ ආශ්‍රයත් සමඟම ඒලියන්ලාගේ බාසාවත් ටික ටික වෙනස් වේ.

මම "නිවු සින්හල සෝන්ග්ස්" කියා ඔබ-නළයෙහි (you Tube) ඔබා හෑන් පී එක ඒලියන් කනේ ගැසුවෙමි.ගායකයා සමඟ ඒලියන් අයියාත් ඇඬීම පටන් ගත් අතර ඔහු ඊළඟට කුපිත වූයේ පහළට බැසගත් කූරෙන් තොණ්ඩුවක් හදාගැනීමට බැරි වූ තැනය.

ඒලියන් ගැන් එකේ පරම අරමුණ වූයේ අප සමූල ඝාතනය කිරීම නොව හුදෙක් ස්වකීය පාලනාධිකාරය මෙහි පැතිරවීම විය.ඒ සඳහා ලාංකිකයන් ඉතා සුදුසු වරිගයක් බවත් බෝලයට අනුව ලන්කන්ස්ලා ඉතා බුද්ධිමත් ජාතියක් බවත් ඒලියන් එකෙක් පැවසූ කල මම ලංකාවේ ඇමති මණ්ඩලයේ ඡායාරූපයක් පමණක් පෙන්වුවෙමි.ලීඩර් ඒලියන් අයියා මගෙන් නොදැන කළ වරදට සමාව ඉල්ලුවේය.

ශ්‍රී ලංකාව වනාහී ස්වයංපෝෂිත රටක් විය යුතු බව ඒලියනයෙක් පැවසුවේය.ඔවුන් අළෝක වර්ෂ ගනනාවක් ඈත සිට ලංකාව දෙස බලද්දී, කාලවකාශයේ වක්‍රතාවය හේතුකොට ගෙන දකින්නට ඇත්තේ මෙහි පරාක්‍රමබාහු යුගය බවත්, දැන් ලංකාවේ ඇත්තේ ස්වයංපෝෂණය නොව ස්වයං වින්දනය පමණක් බවත් වදාරා මම ඔවුන්ව මෝහාන්දකාරයෙන් මුදවා ගතිමි.

නැවතත් නොදැන කළ වරදට ඒලියනයා කොන්ද නවා බැගෑපත්ව සමාව අයැද සිටියේය.මෙසේ උන් දිගටම වැරදි මත ප්‍රකාශ කරන කල්හී අපි ඒවා නිවැරදි කළෙමු.උන්ද එක එක ක්‍රම වලට දිගින් දිගටම සමාව ඉල්ලූ අතර, මට මතක විදියට අන්තිමට සමාව ඉල්ලුවේ කන් දෙක අල්ලා පස් වරක් උඩ පැන පැනය.

___________

පැයක් පමණ ගිය තැන නැවතත් "දඩස්" හඬක් ඇසුනේ වහළේ ඉතුරු ටිකත් පාත් වීමෙන් නොව කවුදෝ දොරට ගැසීමෙනි.

"ළමායි !! මොකද මේ කලබල සද්ද? දොර අරින්ඩ"

"මළා..ඇලියන්"

"කිම? " ඒ ඒලියන්ය

"ඒලියන් නෙවේ යකෝ ඇලියන් අපේ බෝඩිමාධිපතිණිය.ඉක්මනට  හැංගෙන්න අයියා ඇඳ යට...පොලිසියෙන් පැන්නා වගේ තමා"

මා අතින් ඇරුනු දොරින් ඇතුළට ආ ඇන්ටියානෝ මානව කෞතුකාගාරයේ වානරයාගේ සිට හෝමෝ සෙක්සු ඉරෙක්ටස් දක්වා පිළිම නරඹන්නා  සේ අප තිදෙනා නැරඹූහ.ඉන්පසු ලයිටුත් නැතිව කාමරය ආළෝක වී ඇති බව වැටහී යාමෙන් ඉහළ බැලූ විට නීලාකාශය දැක හෝමෝ සේපියන් ඇලියන්ස් බවට පත්වූ එතුමිය කෝපාවිශ්ඨව බැන වදින්නට වූහ.මහලොකුවට ඒලියන් වුවත් ට්‍රික්ස්  නොදත් කමින්, කකුල් එළියට දමාගෙන ඇඳ යට හැංගී උන් ඒලියන් සෙට් එකට සිදුවූයේත් ඒ බැනුම් වැස්සටම තෙමීමටය.

"මොක්කුද යකෝ මේ? තමුසෙලගෙ යාලුවොද? බලහල්ලකො පාලිමැන්ට් එකේ වගේ නැසනලුත් ගහගෙන. තොපි පිකටින් කරලා කරලා ගාය හදාගෙන මෙහෙ බඩු මුට්ටුත් කඩලා දානවා තොපි ඔක්කොටම එකට තියලා ගහන්නෙ පැට්ටෝලියම් එකේ වගේ .කැඩුවා වගේ තොපිම මේ වහළෙ හදන්න ඕනෙ.”අයියලාගේ සිරුරු තුළින් ඒලියන් දාඩිය පෙරෙන්නට විය.ඇලියන් ඇන්ටියානෝ පිටව ගියහ.

ආයිබෝවන් කියාගෙන ආ ඒලියන්ලා "හිහින් එන්නම්" නොකියා කූරේ එල්ලී අභ්‍යාවකාශගත වූහ.

පැය දෙකකට පමණ පසු ඒලියන් ශීට් වලින් වැසී, වහළය නැවත දිස්වීම ඇරඹින.ලීඩර් පැන්සල කනේ ගසාගෙන සිටිමින් මෙස්ර්මන්ට් ගත් අතර අනිත් උන් ඇණ ගසති.අපි උන්ගෙන් ආක්‍රමණ ව්‍යායාමය ගැන විමසීමු.ඔවුන්ගේ රජයේ රැකියාවක් ලබාදෙන වගට ලිඛිත පොරොන්දුවක් ලැබුනොත් ආක්‍රමනයට සහය පළකරන බවට පොරොන්දු වීමු.

"මෙහෙට එන එක ටූ රිස්කි කියලා අපේ සුප්‍රීම් ලීඩර් කිවුවා මල්ලි.මේක අපි දඟලලා දඟලලා ඉන්වේඩ් කරත් මෙහෙ වසන්න බැරි වෙයි කියලා එයා කිවුවේ.ඉස්සෙල්ලා අපි හිතන් හිටියේ මෙහෙ ලීඩීස්ලා මැරි කරලා වර්ගයා බෝ කරන්න.මම කිවුවා ඒක අපේ තියෙන වරිගයත් නැති වෙන වැඩක් කියලා” ඒලියනයාගේ ලැන්වේජ් එක ටෝටලි ලන්කන් වී ඇත.

"එතකොට දැන් මොකෝ කරන්නේ?"

"අපි වෙන බෝලයක් පොඩ්ඩක් අප්ඩේට් කරලා ආයේත් යැවුවා.ඒ පාර වැටුනා මෙහෙට චුට්ටක් උඩින් තියෙන රටකට.ඒක සුපිරිලු."

අපි අමාරුවෙන් සිනාව ගිල්ලෙමු.එය වෙන තැනකින් පිටවිය.

"ඔව් ඔව් එහෙ මරු. හොඳයි අයියේ උන්ගෙ ක්‍රිකට් ටීම් එක මේ දවස්වල මෙහෙ ඉන්නෙ.උනුත් ආපහු ගියාම වැඩේ පටන් ගන්න."

අයියලා වැඩ කුළියත් නොගෙනම පිටව ගියහ.අපි ඒලියන් අයියලාගෙන් හොරෙන් ඉස්සූ අර බෝලය ආසිරිට වික්කෙමු.දැන් මිනිහා දෙවියන් යාළු කර ගැනීමට බෝල විකුණයි.

Read More

ආච්චිට මාර්ග නීති කියාදිමට සොඳුරු උත්සාහයක්!

හුදෙක් ගිමන් නිවීමේ පරම අදිටනින් ආච්ච්ගේ ගෙදරට පතනය වුවත් , ඒ වෙනුවට ආච්චිගෙන් ලැබෙන්නේ  "එළුවාට කොස් කොළ සෙවීම","කොස් කොළ සොයාගත් පසු එළුවා සෙවීම", ගමේ අහළ පහළ පොඩි උන් ඉදිරියේ "නිසි අනාගතයක් නැතිවීමේ" ආදිනව පෙන්වා දීමට ඈ භාවිතා කරන උදාහරණය බවට පත්වීම යනාදී අනේකවිධ රාජකාරිය.

එදින සිදුවූයේ ආච්චිත් සමඟ කඩේ යෑමටය.අවුරුදු දෙක තුනකට පෙර රුපියල් පන්දහසක් ගෙන කඩේ ගියහොත් ගැනීමට සිදුවන බඩු මුට්ටු තොගය ගෙන ඒමට විඳිය යුතු දහ දුක් කන්දරාව දැන් විඳිය යුතු නැති හෙයින්, සැනසුම් සුසුමක් හෙලමින් එළියට පැමිණි ආච්චි මටද ප්‍රේමණීය බැල්මක් හෙලුවාය.

"ගනින් උක්කුං පුතේ ඉක්කූටරේ"

මම ඉස්කූටරයේ තෙල් බෙහෙත් බලා ගරාජයෙන් පිටතට ගත් කල එහි පිටුපසින් නැගුන ආච්චි ඉතිපිසෝ ගාථාව තුන්වරක් කියා,ඇස් දන් දීමේ සහතිකය පෙට්ටගමේ ඇති බවට සීයාට රිමයින්ඩර් කොට රතන සූත්‍රය සඤ්ජායනය ආරම්භ කළාය.

ඉනික්බිති සරුසාර ක්‍රෝටන් වගාව නසන කොළ කන දළඹුවන්,ගොයම් මැස්සන් මර්දනය කරනු පිනිස ක්‍රෝටන්  වගාව මතින් ධාවනය වූ ඉස්කූටරය, මගේ ලිඛිත අවසරයකින් තොරව සියා විසින් වත්තේ සිටුවන ලදැයි උපකල්පනය කළ හැකි ගස්ලබු ගහක වැදුනු කල්හී, ආච්චිට ඇගේ ෂොපින් ලිස්ට් එකෙන් ගස්ලබු ඉවත් කිරීමට හැකිවිය.ඈ ඒ වනවිටත් කියවා අවසන් කර තිබූ රතන සූත්‍රය රිවයින්ඩ් කළාය.

මා ඉස්කූටරයක නැගී යනු දුටු කල ඉරිසියාවෙන් පැලෙන්නට වූ, ඉස්කූරයට හැපී තුවාල වූ, බෆර් ඇද කරගත් ජනී ජනයෝ දෙස් දෙවොල් දෙමින් පොල් ගැසීමට පටන් ගත්තද, කඩිනම් ව්‍යාපෘතියක් යටතේ හන්දියට පැමිණි මම වමට හැරවීම පිණිස දකුණු අතින් සිග්නලයද ස්ථාපිත කළෙමි.

"මොකක්ද උක්කුං පුතේ උඹ ඒ කරපු වැඩේ? පාරෙ යන කෙල්ලන්ට අත වනන්නෙ?"

"නෑ ආච්චි මං සිග්නල්නෙ දැම්මෙ"

"ඇහ්..උඹ සිග්නල් දාන්න දත් මදින එකක්යැ"

"නෑ ආච්චි ඒක සංඥාවක් .අනිත් අයට දැනගන්න මම වමට හැරෙනවා කියලා"

"වමට හැරිලා හරියනවද උක්කුං පුතේ දැන් වමක් නෑනෙ"

මේකනම් මල කරච්චලයකි!

"නෑ ආච්චි ඒවා මාර්ග නීති.අපි හැම තිස්සෙම පිළි පදින්න ඕනෙ.දැන් බලන්න අපි වමට හරවනවනම් මේ අත දානවා මෙහෙම.දකුණට හරවනවනම් අනිත් අත දානවා මෙහෙම." මම ආච්චිට අභිරූපණ ක්‍රමයෙන් සිග්නල් දෙකම පෙන්වා දුන් කල්හී,කාලෙකින් සර්ක්ස් එකක් බලාගත් පාර අයිනේ උන් කොල්ලන් රෑනක් අත්පුඩි, විසිල් සමඟ ගසන්නට වූහ.

මම ආච්චිට මාර්ග නීති කියා දීමේ උත්සාහය අත් නොහළෙමි.ඉදිරියෙන්ම තිබුනේ "උපරිම වේගය" යන මනඃකල්පිත අගයන් සටහන් කර ඇති පුවරු කිහිපයකි.

"දැන් ආච්චි ඔය 70 ගහල තියෙන බෝඩ් එක පේනවා නේද? ඒකෙ තේරුම ඔය ඇඳලා තියෙන වාහන වලට යන්න පුලුවන් උපරිම වේගය 70 කියන එකයි.බුදු අම්මෝ.."

ඒ හාත් සමඟම කන ළඟින් ඇදී ගිය සද්දන්ත ප්‍රාඩෝවක් මීටර පනහක් ඉදිරියෙන් අභ්‍යාවකාශගත විය.සුළං දිශා දර්ශකය මෙන් තුන් හතර වරක් භ්‍රමණය වූ ඉස්කූටරය ආච්චිහේ ගෙදර ඇති දිශාවට අංශක 30ක් හැරී නතර විය.

"සන්තානම් මෑණියනේ ! ඒ ගියේ හැත්තෑවට යැයි?"

" ඉතින් ආච්චි අර හැත්තෑව බෝඩ් එක බලන්නකො.ඒකෙ තියෙන වාහන මොනවද? වෑනුයි,බයිකුයි,කාරුයි..කෝ ප්‍රාඩෝ?"

"හැබෑ නේන්නම්"

*************************

නියම මාර්ගයට පැමිණි පසු මම මගේ සොඳුරු උත්සාහය ෆස්ට් ගියර් එකට දැමුවෙමි.

"තවත් නීතියක් තියෙනවා ආච්චි අපේ ඉස්සරැහින් තියෙන වාහනයක් වම් පැත්තෙන් ඉස්සර කරන්න බෑ"

මම ඒ වාක්‍යය කියනා තෙක් රැක උන් තුන් සක් රියක රියදුරාණෝ එක්වරම ඇක්ටිවේට් වී "පෑං පෑං කියුම් කියුම්" හඬ නඟමින් මගේ වම් අත පැත්තෙන් ඉස්සර කොට පාර අයිනේ තිබූ මාර ගසක දෙබලක් අතරින් රිංගා ගොස් අප ඉදිරියේ තිබූ ටාටා ලොරියක යට යුනිවර්සල් ජොයින්ට් එකත් ටයරයත් අතර මැනැවින් ස්ථානගත වෙමින් සතුටින් විසිර ගියහ.

"ඉතින් අර ත්‍රීවිල් එකේ පුතා වම් පැත්තෙන් ගියේ?"

"වැරදිනේ ආච්චි ! දකුණු පැත්තෙන්නෙ...අපි හිටියෙ එයාට දකුණු පැත්තෙන්නෙ.හරි නීතිගරුකයි.

"හරි එතකොට එයා අපේ දකුණු පැත්තෙන් ගියොත්?"

"ඉතින් එතකොට පස්නයක් නෑනේ.වමෙන් ඉස්සර කරේ නෑනෙ.දකුණෙන්නෙ අනික අර ලොරිය යටිනුත් ගියාට ඒක වරදක් නෙවේ,මොකෝ යටින් යන්න බෑ කියලා නෑනේ"

"අනේ මන්ද බං මේ නීති නං...ඇහ්..ආං ආං අර බලහන් පුතේ.පොලිස් වාහනයක් නේද වාහන නැවැත්වීම තහනම් බෝඩ් එක ගාවම නවත්තලා තියෙන්නෙ?"

ඉස්කූටරයේ සයිලන්සරයේ දුමත් සමඟම මගේ කේන්තියත් පිටවිය

"එහෙම නැතුව ආච්චි ඒ උත්තමයෝ වාහනේ ගෙදර නවත්තන්නයැ.ඒ මිනිස්සු දහඩිය මුගුරු (බැටන් පොලූ ) හෙලාගෙන දුක් විඳින්නෙ නීතිය ආරක්ෂා කරන්නනෙ."

"එහෙමයි කියලා පොලිසියෙ ඇත්තොත් නීති කඩන එක හොඳ නෑනෙ පුතේ"

"ඇයි ආච්චි, ළමයින්ට එපා කිවුවට ඉස්කෝලෙ ප්‍රින්සිපලුත් රැවුල වවන් ඉස්කෝලෙ එන්නෙ"

ආච්චි ෂට් අප් විය.සැබැවින්ම පොලිස් වාහනය එතැන නවත්තාගෙන සිටියේ කිසියම් උත්සවයකට ආරක්ෂාව සැපයීමටය.එය අවුරුදු උත්සවයක් විය හැකි වුවත් ඒ මතය වෙනස් වූයේ විශාල බැනරයක් දුටු කල්හීය.

~ත්‍රයි සක් ඉන්ද්‍රජාල සංදර්ශනය~

"ආ එන්න මල්ලි එන්න මල්ලි ...ත්‍රීවිල් මැජික් සෝ එකක් එන්න එන්න" සංවිධායක මණ්ඩලයේ කෙනෙකුයැයි සැක කළ හැකි කෙනෙක් ශ්‍රි ලංකන් එයා ලයින් ගුවන් සේවිකාවකට වඩා සුහද විය. ආච්චිටත් මටත් අනුන්ගේ රෙද්දවල් සෙවීමේ වුවමනාව ජානගතවම ඇති වුවත් කතා කළේ තුන් සක් රියක මහතෙක් බැවින් යෑමට කලින් ගානක් කතා කර ගැනීමට වුවමනා විය.

රුපියල් එකසිය පනහකට සෙට්ල් වූ පසු මැජික් සෝ එක බැලීමට අපි ඉදිරියට ගියෙමු. ටිකකින් එය ආරම්භ විය. මීටර් 50ක් පමණ දිගට එක දිගටම දෙපැත්තේම මිනිසුන් රැස්කමින් සිටියේ මැද තීරුවක් ඉඩ තබමිනි.විස්ල් හඬක් සමඟම ඈත කෙළවරේ නවතා තිබූ තුන් සක් රියක් පෙර කී තිරුව දිගේ අප දෙසට ගමන් ආරම්භ කළේය.විශ්මය දනවන, "බුදු කිරි අපුච්චේ" සිට " වාව්, ෆැන්ටෑස්ටික්" දක්වා වචනද කන් බෙර නටන තරමට විස්ල් හඬවලින්ද අවට පරිසරය පිරී ගියේය

"තුන් සක් රිය සම්පූර්ණ දුරම ගමන් කරයි. හරි කෙලින් !!!"

යම් දුරකට පසු රථය දකුණට හැරවින. පෙර කී ඝෝෂාව දෙගුණ තෙගුණ වූයේ එවිටය.

තුන් සක් රියේ මූණේ දකුණු පැත්තේ තැඹිලි පාට බල්බයක් නිවි නිවි පත්තු වේ !!!!!

ඉදිරියට පැමිණි ෆොන් වලින් මූණු වැසී ගියේයැ.සෙල්පි ගැසීමට ගොස් කෙල්ලන් තුන්සක් රියේම හැපීමට ගියේයැ.

දකුණට හැරුනු පසු අර බල්බයද නිවී ගියේය.අත්පොලසන් නාදය තවත් තිව්‍ර වූ අතර මමත් ආච්චිත් සෝ එකෙන් බැහීමට යන විට කලින් ටිකට් කැඩූ මහතා වැඩිපුර රුපියල් සීයක් ඉල්ලූ අතර, එය ගෙවා එළියට විත් නැවත ඉස්කූටරයට නැගුනෙමු

ආච්චිට ඊළඟ දේශනාව ලබාදුන්නේ තනි ඉර හා ඩබල් ඉර කැපීම සම්බන්ධයෙනි.ඩබල් ඉර කපන ආකාරය ප්‍රායෝගිකව පෙන්නීම පිණිස ඉස්කූටරය ඉරි ළඟටම පැදවූ කල්හී ඉදිරියෙන් රැක උන් පොලිස් මැතිඳානෙක් විස්ල් එකක් ගසා පාරට අත දැමූ සේක.

ඩබල් ඉරේ යාන්තම් ගෑවීම පමණක් වූ බැවිනුත් අවුරුද්ද ළඟ නිසාත් යම් ඩිස්කවුන්ට් එකක් ඇති බව සිතමින් මම අත දැමූ පොලිස් උතුමාණන් ඉදිරියේ ඉස්කූටරය නවතා,දත් තිස් දෙකම පෙන්නනු පිණිස හක්කද ඇජස්ට් කළෙමි..

උතුමාණෝ මා වැනි බිළින්දා වර වර යයි ළඟට කැන්දා ලයිසම කොයින්දා කියා විමසා හුරතල් කරන්නට වූහ.

"රාළහාමි ඉස්සරහ වීල් එක නේද පොඩ්ඩක් ගෑවුනේ?"

පොලිස් උතුමාණෝ මනින ටේපයක්ද ගෙන ඉස්කූටරයේ ටයරයද, මැද ඉරේ පළලද මැන ස්වකීය විචක්ෂන,අශීලාචාර බුද්ධියෙන් විමසා මෙසේ පැවසූහ.

"නෑනෙ මල්ලි ! ටයර් එකෙන් බාගයක්ම ගෑවිලා නේ.ලියන්නම වෙනවා"

"අනේ රාළහාමි..අපේ ආච්චිට සෑහෙන්න අමාරු වුනා ටිකකට කලින් මේ හොස්පිටල් අරන් යන ගමන්" එකී වදන් පිළිගැනීමට මැළිකමක් දැක්වීමට හේතුව දත් කැකුළු පාමින් ගහක් ගලක් සේ හිටගෙන උන් ආච්චි දැකීම විය යුතුය.

පොලිස් උතුමාණෝ ලිවීමටම උත්සහ කළහ.

"අනේ රාළහාමි අපි ගොඩක් දුර ඉඳන් එන්නෙ."

"මොනා කරන්නද මල්ලි.ආයේ එන්නම වෙනවා ලයිසන් එක ග......" උතුමාණෝ එකවරම ගල්ගැසී සීරුවෙන් සිටගෙන සැලියුට් ගසන්නට වූ අතර පරිවාර නිළදාරීහූද සියළු වැඩ අතහැර එය අනුගමනය කළහ.

අත්ඩංගුවේ උන් කසිප්පු කාරයෙන් පැන ගියේය.

 එක දිගටම හෝන් සබ්ද පූජා පවත්වමින් මුලින්ම පොලිස් බයික් දෙකක්ද,ඉන්පසු ජීප්පුවක්ද, ඩබල් කැබ් එකක්ද,බෙන්ස් කාර් එකක්ද යනාදී වශයෙන් වාහන සේල් එකක්ම එක දිගට ඇදී ගිය අතර ඔවුන් සිදුකළ ප්‍රමුඛතම කාර්යය වූයේ එක රෝදයකට එක් වර බැගින් ඩබල් ඉර කැපීමයි.ඊළගට පාරේ එහා ලේන් එකේ කෙළවරේ ඉරද කැපීමයි.වාහනවල බොනට්වල මිනිස්සු රෑනක් එල්ලී "බේරගනියෝ" කියා කෑගැහුවේ ඇයි දැයි නොදනිමි. ගරු ඇමතිතුමා දැකීමෙන් ප්‍රීතියෙන් පිනා ගොස් ඇස් වලින් සතුටු කඳුලු ගලන දෑස් වලින් පොලිස් උතුමාණන්ට මේ කිසිවක් නොපෙනෙන්නට ඇත.

"ඇයි රාළහමි මහත්තයො අර වාහන නැවැත්තුවෙ නැත්තෙ?" ඒ කිසිඳු විචර බුද්ධියක් නැති ආච්චිය."

"ඒ උත්තමයෝ මේ පොඩි පාරෙ යන්නෙ කොහොමද නැත්නම්?.බලන්ඩකො පාර අඩි දහයයි. මල්ලිගෙ බයික් එක පළල අඩි තුනයි.මල්ලිට පස්නයක් නෑ. ඒත් ඇමතිතුමා..ඒ වාහනේ අඩි අටයි .සයිඩ් කණ්නාඩි වලට තව අඩියයි.එළියට දාන අත් වලට තව අඩි දෙකයි.ඔක්කොම එකොළහයි.ඒකට සීයට පහළොවක් තිබ්බාම කොහෙද ඉඩ?"

"මොකක්ද ඒ සීයට පහළව?"

"මේ ඇමතිතුමානම් සීයට පහළව තමා ගන්නෙ.අනිත් අය කොහොමද දන්නෙ නෑ"

කුමන බාසාව දැම්මත් දඩය නැවැත්වීමට නොහැකි විය.ඒත් අන්තිමේ පොලිස් උතුමාණෝ මෙසේ පැවසූහ.

"හරි දැන් මල්ලියි මායි දෙන්නම මෙතන රස්තියාදු වෙනවා.වැඩක් නෑ මං කියන්නද...මල්ලි මට පන්සිය පනහ දෙන්න.මං ගිහිල්ලා ගෙවන්නම්"

"මොකක්ද බුදු රාළහමි?"

"ඔව් මල්ලි අපේ රාජකාරිත් එක්ක එහෙම මෙහෙට යන එක හරි අමාරුයි.ඒත් මල්ලි හොඳ කෙනෙක් වගේ පේනවා.මම කොහොමහරි පෝස් ඔපිස් එකට ගිහිල්ලා දඩේ ගෙවලා දාන්නම්"

මට මගේ ලයිසනය ලැබුණු අතර ඉන්පසු අපි සේක් හැන්ඩ් කළෙමු.සේක් හෑන්ඩ් එකෙන් මට නැවත අත පමණක් ලැබුණි.රාළහාමිට මුදල් ලැබුනි

මේ උත්තම වූ සත්ක්‍රියාව දැකීමෙන් බෙහෙවින් ඉම්ප්‍රෙස්ඩ්  බවට පත්වූ ආච්චි පොලිස් උතුමාණන්ට නිරෝගී සුවයත්, කෙළවර අජරාමර නිවනත් පතා කඳුලු සැලුවාය.එතැනින් නොනැවතුනු ඈ දුරින් නෑයෙක් වෙන ලොකු පොලිස් උතුමෙක්ටද මේ උතුම් කාර්යය ගැන දන්වා ලිපියක් යැවුවාය.

දැන් ආච්චි තනියම කඩේ යයි.

මම උසාවි යමි.

Read More

How Is My Driving ? | හව් ඉස් මයි ඩ්‍රයිවින්(ග්) ?

මින් පෙර ලියූ පරිප්පු හොද්ද කතාවට සම්බන්ධයි.එතනට ගිහින් එන එකත් හොඳයි

"අඃ .ඔව් මචන් බුදු පිළිමෙ ගාවින්..ඔව් දකුණට..ඔව්..කොච්චර දුරද..හැතැක්ම?..SI යුනිට්ස් වලින් කියපන් බන්.මට හැතැක්ම තේරුමක් නෑ...."

ට්‍රබල්සූට් එක අතකින් ෆෝන් එකක් කනේ තියාගෙන,අනිත් අතින් වාහනේ රේඩියෝ එකේ සද්දෙ අඩු කරන ගමන් ,තවත් අතකින් ෂටර් එක පාත් කරන්න දරුණු උත්සාහයක නියැලිලා ඉන්නවා.ඔව් තව අතක් තිබුනෙ නෑ .ඒක තමයි මිනිහට කේන්ති යන්න ඇත්තෙ.

"කියන එකක් තේරෙන්න කියහන්කො බන්.කළුවර වැටෙන්න කලින් පාර හොයාගන්න"

"මචෝ ..මචෝ උන්ගෙ ගෙවල් තියන තැන හරියටම අහගනින්.යකෝ ගූග්ල් මැප් ,ජීපීස් තියෙන්නෙ වැල බලන්නද? " ඩීබග් කාරයත් සිතූ පැතූ සම්පත් ලබාදෙන ගූග්ල් දෙවියන්ව වැඩමවන්න කලින් තේවාව පටන් ගත්තා.

"මචන් උඹල දැකලා තියෙනවද ඩ්‍රයිවර්ලා ඉන්නවා.ඔය කිසිම මැප් එකක්වත් නැතුව ,කාගෙන්වත් අහන්නෙ නැතුව පාරවල් හොයාගෙන යන?.උන්ට හන්දියක් දැක්කාම හිතෙනවා.මම යන්න ඕන මේ පාරෙ..මේ පාරෙ ගියාම මෙතනට වැටෙයි..එහෙම" 

සමහර අය ඉන්නවා ,මොකක් හරි ප්‍රශ්නයක් මතුවුනාම ඒකට උත්තර හොයන එක පැත්තක තියෙද්දි,පෙරකී ප්‍රශ්නය අමතක වෙනකල්ම කොටින්ම එකී ප්‍රශ්නය තවදුරටත් ප්‍රශ්නයක් නොවෙනකල්ම ,නන් දොඩවන.

අර අමුතු ඩ්‍රයිවර්ලගෙ කතාව කිවුවේ ක්ලේමෝ.පොර තමා අපේ වාහනේ එලවන්නෙත්

අපි හතරදෙනත් එක්ක මේ වාහනේකුත් අරන් දඟලන්නේ එක්තරා විදියක ට්‍රිප් එකක් යන්න.ටුවරිස් බෝඩ් එකෙන් අනුමත වෙච්චි ,ලෝක පූජිත,ලෝක උරුමයක් වෙච්ච තැනකට නෙවේ..දන්න කියන යාලුවෙක්ගේ ගෙදර, පොඩි ආරාධනාවක් ලැබුනා.

වනගත චාරිකාවක භීතියත්,වෙල් යායකින් හමන සීත සුළඟක මුදු පහසත්,සිලි සිලි හඬින් රැළි නංවන වැවක ඔරු සංචාරයක චමත්කාරයත් ,පොල් මලක් කැපීමෙන් රූරා වැටෙන.... බ්ලා බ්ලා බ්ලා එට්සෙට්‍රා විඳගන්න එන්න කියලා.ක්ලෝමෝ,ඩීබග්,ට්‍රබල්සූට් ,මම අපි හතරදෙනා එක් අරමුණක් වෙනුවෙන් ඒකරාශී උනා.ඒකම මදැයි 

අපේ යාලුවගේ ගෙවල් තිබුනේ ගොඩක් දුරක.අයිසොලේටඩ් එහෙමත් නැත්නම් ,අනේ මන්ද සිංහල වචනයක්නම් මතක් වෙන් නෑ..කොහොමහරි එහෙම තැනක.

මේ ඔක්කෝටම මුල ඒකයි.පාර හොයාගන්න බැරි වීම,කළුවර වැටීම,වෙහෙස,විවිධාකාර මතවාද හැමදෙනාම පෙලන්න ගත්තා. 

"ඒ කියන්නේ මචන්,ඒගොල්ලෝ හිතන විදියට හැම තිස්සේම පාරවල් එයාල එක්ක කතා කරනවා." මේ වචනත් ක්ලෙමෝගේ කියලා අමුතුවෙන් කියන්න ඕනෙ නෑනෙ.මිනිහා දිගටම කියවනවා.

"එක්තරා තැනක ඉඳන් තවත් තැනකට යන්න ඕනෙනම් උන්ට යන්න මාර්ගයක් එකවරම පේන්න ගන්නවා.කාගෙන්වත් අහන්නවත්,ගූගල් මැප් හොයන්නවත් ඕන නෑ"

"මොනවද යකෝ මේ කියවන්නේ? දැන් උඹ මොකක්ද කරන්න කියන්නේ? පාර අහගන්න එකෙක් ඇත්තෙත් නෑ.පාරෙ බෝඩ් ඇත්තෙත් නෑ"ඒ ට්‍රබල්සූට්.

රේඩියෝ එක සද්දෙ අඩුකරගෙන,ෂටර් එකත් පාත් කරගෙන හිටියත්,කේන්තිය එහෙම්මමයි.

 "වට් යූ හැව් ටු ඩූ ඊස්.බිලීව් ඉන් යුවර් සෙල්ෆ්.අපි යමු.රිස්ක් එකක් ගමු.ටිකක් යද්දි හැමදෙයක්ම ක්ලියර් වෙලා උත්තරයක් ලැබෙයි" ක්ලේමෝ

"ඔව් පෙට්‍රල් ටැංකියත් ක්ලියර් වෙයි.උඹේ පඬි වදන්.මචන් මැප් එක මොකෝ.?"

"ලෝඩ් වෙන්නෙ නැති සීන් එකක් වගේ.සිග්නල් මදි" ඩීබග් එයාගේ දුරකතනය සොළව සොළවා අල්ලට තට්ටු කරන්න ගත්තා.එහෙම කළාම සිග්නල් වැඩි වෙන්නේ වග අපිට තේරුනාට ,අපි ඒ ගැන පොරට එක්ස්ප්ලේන් කරල දෙන්න ගියේ නෑ.

"දැන් අරූ මොකද කියන්නේ "මමත් වචනයක් දැම්මා

"අපි ඉන්න තැන කියන්න විදියක් නෑනෙ බන් හරියට.ඉතින් කොහොමද මිනිහ අපිට පාර කියන්නෙ"ඒ ට්‍රබල්සූට්

ලා කළුවරක් ගොඩබිම වහගෙන විසිරෙන්න ගත්තා.පේන තෙක් මානෙක මිනිස් පුළුටක් නෑ.හිටියද දන්නේ නෑ, අපිට පේන්නෙ නෑ.ට්‍රිප් එක කෙසේ වෙතත් කොහෙට හරි වෙලා දපන්න තිබුනනම් එකක් කියලා හීනියට හිතෙන්න ගත්තා.එක දිගටම වාහනේකට වෙලා ඉන්න එකත් ලේසි දෙයක් නෙවේනෙ.මෙච්චර වෙලාත් මාරුවෙන් මාරුවට අපි හතර දෙනා තමයි එළෙව්වෙ.

"ඔහොම යමු බන්..මොනවහරි හඳුනාගත හැකි මාර්ග සළකුනක් ලැබෙයි" මම මොරාල් අප් කරන්න හිතාගෙනද කොහෙද කිවුවෙ.ඩව්න් වෙලා තිබ්බ වයිෆර් දෙකනම් අප් උනා.හීනි පොදයක් වැටෙන්න ගත්ත නිසා.

එකපාරටම පරණ පන්සලක්ද කොහෙද ඉස්සරැහින් පේන්න ගත්තා.පාර අයිනෙ තිබ්බ දුර්වර්ණ නාම පුවරුව කියවගන්න වාහනය නවත්තන්න ඕන වුනේ නෑ.ආපහු හරවන්නයි වුනේ.ඒ රජමහා විහාරය ගැන අපේ ගමේ යාලුවට කිවුවට පස්සෙයි.අපි එච්චර වෙලා යමින් හිටියේ වැරදි පාරක.කොච්චර වැරදිද කියනවානම් අපේ ගමේ යාලුවටවත් පාර කියාගන්න තේරුමක් නෑ.පන්සලේ කවුරුවත් ඇත්තෙත් නෑ.ජරාවාස වෙච්චි තැනක්

"ඈ හු#* කෝ අර තොගෙ බිලීව් යුවර් සෙල්ෆ් එක?බලපන් ඉතින් නිකන් අපරාදෙ කිලෝමීටර් ගානක් " ට්‍රබල්සූට් ජාතිය අමතන්න පටන් ගත්තා.

ඒක සෑහෙන්න වෙලාවක් බල පැවැත්වුනා.කන් දෙක දෙබෑ වෙන තරමේ සද්දයක් ඇහෙනකල්ම.ඒක ඇහුනේ වෙන කොහෙන්වත් නෙවේ අපේ වාහනෙන්මයි.ක්ලේමෝ ගහපු බ්‍රේක් පාරෙ සද්දෙ.ටයර් හතර පිච්චෙන ගඳ පවා අපේ නාස් පුටු අස්සෙන් ඇතුළට රිංගුවා.

"දැන් උඹලා මට මොකක්ද කරන්න කියන්නේ.අරූට පාර කියන්න විදියක් නෑ.පාර අහන්න එකෙක් නෑ.මුගෙ මල ඉලව් මැප් එක වැඩ නෑ.සිග්නල් නෑ ,බැටරි බහින්න යනවා.තොපි මොනවද මට කරන්න කියන්නේ" විපක්ෂ නායකගේ ජාතිය ඇමතීමටත් සවන් දෙන්න වුනා මටයි ,ඩීබග්ටයි.

ට්‍රබල්සුට ලොකු ප්‍රතිචාරයක් දැක්වුවේ නෑ.වාහනය ටිකක් අයිනට කරලා නැවැත්තුව ක්ලේමෝ දොර ඇරලා සීට් එක දිග ඇරගෙන ඇළවුනා.ඒක අනිත් අයටත් ආදර්ශයක් වුනාද කොහෙද .පිටිපස්සෙ සිට් දෙකේ උන්නු මටයි ,ඩීබග්ටයි ඇල කරන්න සීට් එකක් තිබ්බෙ නෑ.ඒත් අපි දෙන්නත් දොරවල් දෙකම ඇරගත්තා.ලොකු වාහනයක් ඇවිත් අපේ දොරවල් දෙකත් අරගෙන යාමේ අවදානමක් ඇති වුනේ නෑ පාරේ වාහන නැති නිසා.

සිග්නල් කණුවක් වත් නැති ,එහෙයින් ගූගල් මැප් වනාහී මායාවක් වෙච්ච ,මිනිස් පුළුටක් නැති පැත්තක කොල්ලො හතරදෙනෙකුයි ,වාහනයකුයි !

අපි කිසිම වචනයක් නැතුව,හාවක් හූවක් නැතුව එහෙම්මම ඇල වෙලා හිටියා.දොරවල් හතරම ඇරලා දාල තිබුන නිසා එක පැත්තකින් වාහනය තුළට ඇතුල් වෙච්ච වාත ප්‍රවාහය අපේ ශරීර කෙඩෙත්තුවත් අරගෙන අනිත් පැත්තකින් පිට වෙලා ගියා.

හුදකලාව මිනිස්සුන්ට හුඟක් දේවල් කියලා දෙනවලු.ගොඩක් දේවල් අවබෝධ වුනත් ඒක වචන වලට හරවන්න පුලුවන් සමර්ථයෙක්ට හිටියෙ එක්කෙනයි.ඔව් ක්ලෝමෝ! පඬි වදන් සමඟින් දැන් වේදිකාවේ !

"පාරක් හොයගන්න එක හතරදෙනෙක්ට ගොඩක් සරල දෙයක් කියලා නේද මචන් හිතාගෙන හිටියෙ"

"හ්ම්ම් " X 3

"හතරදෙනාට තිබ්බේ වෙන වෙනම උපක්‍රම.උඹලට තේරුනාද දන්නේ නෑ"

"හ්ම්ම්.උඹ වැඩි උදව් හොයන්නෙ නැතුව තමන්වම විශ්වාස කරගෙන,අන්තිමේ යන්න ඕන තැන හම්බවෙයි කියලා හිතාගෙන" ට්‍රබල්සූට් කතා කරනවා.

"ඩීබග් යන්න ඕන තැනට යන්න හොඬ ප්ලෑනක් ගහලා,කොටින්ම යන විදියත් හරියටම හොයාගන්න හැදුවා" ආයෙත් ට්‍රබල්සූට්

"එතකොට උඹ..යන්න ඕන තැනට යන්න මාර්ග සළකුණු හොය හොය ,මිනිස්සුන්ගෙන් අහගෙන යන්න හැදුවෙ" 

"එතකොට මම ?" මගේ කුතුහලයත් ඉලිප්පිලා ආවේ ,සාස්තරයක් අහන්න අත දික් කලා වාගේ

"උඹ වෙන දෙයක් වෙද්දෙන්.පෙරලෙන පැත්ත හොඳයි"කියපු කෙනා මතක නෑ.ඒත් කියපු දේ හොඳට මතක හිටියා

"ඩ්‍රයිවින් විතරක් නෙවේ බන් කොයි දේත් ඔහොමයි බැලුවාම.එකෙක් ඕන දේ ළඟට එනකල් බලන් ඉන්නවා.තව එකෙක් ඒක හොයාගෙන යන්න දත කනවා.හොයාගෙන යන්නෙත් එක එක විදිවලට.හොයාගෙන ගියාම අහනවා 'උඹ කොහොමද බන් හොයාගෙන ආවේ කියලා' ,වෙන එකෙක් ඒ විදියට කරන්න ගිහින් ඇනගන්නවා.අන්තිමේ බැලුවාම ප්ලෑන් ගැහැවුවත් එකයි ,නොගැහැවුවත් එකයි.වෙලාවකට හිතෙනව බන් අපි මේ දුවන්නෙත් මෙලෝ තේරුමක් නැති හු#*ක් හොයාගෙන කියලා.

"හ්ම්ම් හැම එකාම නන්නත්තාරේ දුවනවා.ඌ දන්නෙත් නෑ කොහෙද කියලා" ඩීබග්

මටත් වචනයක් දාන්න හිතුනා

"පාඩුවෙ වෙන්න තියෙන දේ වෙයන් කියලා ඉන්න එකත් හොඳ නැද්ද බන්..නිකන් හිතපන් උඹ ගස් ගොඩක් තියෙන වත්තක ඇවිදිනකොට පොල් ගෙඩියක් වැටෙන සද්දයක් ඇහෙනවා කියලා.උඹලා මොකද කරන්නේ එක තැන සීරුවෙන් ඉන්නවද,කඩාගෙන බිඳගෙන දුවනවද,පාඩුවෙ යන්න ගිය ගමන යනවද?ගස් කොලන් බන් වටේම ....පොල් ගෙඩිය ළඟට එනකල් පේන්නෙ නෑ.උඹල අර කියපු තුනෙන් මොක කළත් පොල් ගෙඩිය ඔලුවට පාත් වෙන්න පුළුවන්.මම නම් පාඩුවෙ ගමන යනවා"

හැමෝටම හීනි හිනාවක් ගියා.හිත හෑල්ලු කරන හිනාවක් .තව බොහෝ වේලාවක් අපි එහෙම්මම ඉන්න ඇති.අන්තිමේ නින්දත් ගිහින්.පහුවෙනිදා පොළොවට පතිත වෙච්ච සූර්යාලෝකයත් එක්ක අපි ඇහැරුනේ ආරෝපණ හිස් වෙච්ච බැටරිවලින් සහ හොඳින් ආරෝපණය වෙච්චි හදවත් එක්ක

ඔව් අලුත් දවසක් !

අද ඕනම දෙයක් වෙන්න පුලුවන්

සමහර විට අලුත් සිග්නල් කණුවක් හයි කරයි මේ පැත්තේ

උදේ පාන්දර කොහෙහරි යන එකෙක් මුලිච්චි වෙයි

එක්කො පොලිසියට අහු වෙයි

හිරේ යයි

කොල්ලකාරයෝ ටිකකට අහුවෙයි ...

ඕන එකක් 

ඔය ඔක්කෝමත් මැද්දෙ අපි අපේ විදියට ජීවිත වාහනේ, නොදන්න පාරවල්වල ඩ්‍රයිව් කරයි දන්න හෝ නොදන්න තැන් හොයාගෙන.මඟදි හම්බුවෙන හැමෝම යන්නේ එකම ගමනක්.එකම ගමනක් කියන එකෙන් "එකම තැනකට" යනවා කියන එක ගම්‍ය වෙන්නේ නෑ.

එකෙක්වත් යන්නේ හොහෙද කියලා දන්නෙ නෑ ! ඒකයි එකම ගමනක් කිවුවේ.

ඒ නිසා එක එකාගේ ගමන දිහා බලලා කෝචෝක් දාන්න එපා.මොකද උඹ යන්නෙත් එහෙටම තමයි..

ඔක්කෝම අමුතු ඩ්‍රයිවර්ලා

So 

How Is My Driving?

Read More