උඹයි,මායි,පාට බෝට්ටුවයි, ලොකු හැඳි දෙකයි ,ගෝවා පැළයි

මතු කොන්පියුස් වීම වළකනු පිණිස ප්‍රථමයෙන් උඹ නටද්දී පපුවේ කරකැවෙන ගිනිබෝල කියවන්න


අද තදට පායනවා කියා රේඩියෝ එකේ කාලගුණ මහත්තයා කිව්වෑයිං පස්සේ කුඩේකුත් අරන් එළියට බැස්ස මට ,මගදි අහු වෙච්චි මහ වැස්සේම අකුණක් වැදුනේ නැත්තේ ඇයි කියා හිතුනේ හන්දියෙදි කකුල් දෙක ළඟට ගහගෙන ආපු උඹගේ මල්ලිලාගෙ කඩදහි බෝට්ටුවක් අහුළගෙන ඒ මේ අත පෙරල පෙරල බලද්දියි.
උඹලෑ මල්ලිලා බෝට්ටු බඳේ TITANIC කියලා ලියලා තිබුන අකුරු ඇරුණාම තවත් අකුරු රාසියක් දැක්ක තැන ඒවා අමාරුවෙන් හරි කියවගත්ත හින්දායි ඒ.

උඹ කඩේ කැසියර් කූඩුවෙ ඉන්නකොට සනීප නැද්දැයි කියලවත් අහයි කියලා ගාමිනී ෆොන්සේකා මහත්තය මගේ දිව ඇදලා අරගෙන කඩේ වතුර රත් කරන  සෝ කේස් එහෙක අඩුක් කරල තියෙන .TITANIC. මයෙ කාමරේ තියෙනවා 
ඒ හැටි පෙනුමක් නැති,ඒ හැටි සල්ලි බාගෙත් නැති අර අවලං මන්තිරිය පස්සෙ යන්න ඕන නෑ එතකොට.
 හිකි හිකියත් එක්ක කිචි බිච්චියත් එක්ක අර දුඹුරු පාට බලු තඩියා පෙරහැර බලලා ගහෙන් බැහැලා පැටලිලා වැටුන නංගියේ රුවිතෙට...

වතුරට පෙඟිලා තිබුණත් රටාවට නවාපු කොළේ කියෝගන්න වැඩි වෙලා ගියේ නෑ..
අනුමාන කරන්න ඒ හැටි දස්ස නොඋනත් මේ බෝට්ටුව ඇරුනාම තවත් බෝට්ටු දෙකක අහළ පහළක තියෙන්ඩ ඕනෙය කියා කරපු අනුමානය හරියටම හරිගියේ මම උඹට එවුව ලියුමේ කොළ තුනක් තිබ්බ බව සිහි උන නිසාය 

මගේ අතින් ලියවිලා ,ලහිපිට අතිරේකය ඇතුළේ හැංගිලා උඹේ අතට ගිය මගේ ලියමන හත් අට වාරයක් නැවිලා මේ විදියට සැඩ පාරක ගහගෙන යනවා දකිද්දි මයෙ මෝඩ හිත ඇතුලෙන් පටං අරන් නහර වැල් දිගේ ඇඟ පුරාම ගහගෙන ගිය සැඩ පාරේ වේදනාව උඹ දන්නවානම් !
ටිකක් දුර ඉස්සරහට එද්දි පෙනිච්චි නගාලගෙ කඩේ ඉස්සරහ සෙනග පිරිලා උන්නා.ඒ වැස්සට කුඩයක් නැතිව එළියට බැහැලා දැන් යන එනමක් නැතුව ඉන්න ඈයො මිසක් බඩු ගන්න ආපු උදවිය නෙවේ.උන්ට කඩේ මතක් වෙන්නේ වැස්සක් වෙලාවට විතරක් උනත් මට එහෙම නොවෙන හින්දාද මන්දා කකුල් දෙක මගේ ශරීරයෙන් වෙන් වෙලා ඒ පැත්තටම ඇදිලා ගියා.කකුල් දෙකට ඌට ඕනෑ හැටියකට නටන්න දුන්නත් කටට ඒ අවස්ථාව ලබා නොදෙන්ඩ අධිස්ඨාන කරගත්තේ,කට වැරදීමකින් මී පාසානං නැත්නම් කඹයක්වත් ඉල්ලුවොත් උඹ ඒක දෙන්නත් හපනි කියලා මට හිතිච්චි නිසයි.. 

කඩේ හිටිය උන් මයෙ දිහා බැලුවේ හරියට විපක්ෂ නායකතුමා දිහා බලන්නා වගේ,මට පෙනිච්චි හැටිද මන්දා.ඒ උනාට උන් හිටියේ හරියට නගාගේ මල්ලිලා යවපු බෝට්ටු ගැන සූරියප්පෙරුම මහත්තයා දොරමඩලාවේ කතා කරනවා ටී වී එකෙන්  බලපු ඈයින් ව්දියට

"බලන්ඩ හසන්ත මහත්තයෝ,දැන් කොම්පියුටර් ඇතුළේ හිරවෙච්චි ළමා මොළ ඒ කාලේ ගෙවුනේ මේ වගේ සරල දෙවල් එක්ක.(එක බෝට්ටුවක් කැමරාවට පෙන්නයි ) මේක මට අහුලගන්ඩ ලැබුණේ පාරක් අයිනේ තිබිලා.බලන්ඩ මේකේ උඩ ලියලා තියෙන දෙවල්

 " අර දුඹුරු පාට බලු තඩියා පෙරහැර බලලා ගහෙන් බැහැලා පැටලිලා වැටුන නංගියේ රුවිතෙට..." 

කොච්චර සුන්දර ළමා මනෝභාවයන්ද?බලන්න දුඹුරු පාට බල්ලෙක් එනවා කොහෙ ඉඳන්ද ,ගහෙන් බැහැලා..අපේ බණ පොත්වලත් තියනවා ගස් වලින් බැහැලා ආපු දෙවතාවෝ ගැන ..බලන්න නංගියේ ඌ පැටලිලා වැටුණා"

කැෂියර් කූඩුවේ නෙවෙයි උඹ හිටියේ කඩේ රාක්කයක් ගාව අනිත් පැත්තට හැරිලා.කිසිම හේතුවකුත් නැතුවම වගේ ආපහු මේ පැත්තටම හැරුණ.ඒත් උඹ මාව දැක්කේ නෑ.මම උඹව හොඳට බලාගත්තා.උඹේ ඇස් දෙක එහෙම්මමයි තාමත්,කොච්චර නපුරු පාටක් ගන්න හැදුවත් හංගන්න බැරි ගොඩක් දෙවල් එළියට පනින්න දඟලන.

අර පිටු තුන නැවිලා බෝට්ටු බවට පෙරලෙන්න කලින් උඹේ ඔළුව ඇතුළේ පෙරලියක් කරපු වග මම දන්නවා.ඒ වගේම බෝට්ටු හැදෙන්නත් උඹේ සම්බන්දයක් නැති වගත් මම දන්නවා

ඒත් දවසක අපි දෙන්නම් එකතු වෙලා ලොකු බෝට්ටුවක් හදමු හොඳට ඉඩ කඩ තියෙන ,බඳේ අකුරු වෙනුවට ලස්සන පාටවලින් පින්තාරු වෙච්ච.හබල් නැත්නම් අපි ගමු ලොකු හැඳි දෙකක්.මේ හෙණ ගහන ,ඇඟ කිළිපොලන කටුක වැස්ස ටිකකින් නවතියි..ඊට පස්සේ හොඳ කාලයක්,හොඳ අව්ව..ඩිංගෙන් ඩිංග බහින වතුරේ උඹයි ,මායි ,පාට ඔරුවයි...වතුර ගහගෙන යන පැත්තටම ගියත් ,යන්න ඕන පාරට දාගමු මහන්සියෙන් හරි ..යනින් ගමන් අපි නවත්තනවා ගොවි ජන සේවා මධ්‍යස්ථානය ළඟ..උඹව ඩිංගකට බෝට්ටුවේ තියලා මම ගිහින් ගේනවා ගෝවා පැළ තිහක් හතළිහක්..මළා..කඩේ ලෑලි ටික වැහුවෙ නෑ නේද?මම නගාව ඇරලවලා එන්නම්,හැබැයි මට ආපහු යන්න ඕනෙ බෝට්ටුවෙම
කොහාටද?
පුත්තලමට
ඒ මොකටද?
මේ ගෝවා පැළ ටික හිටවන්න
ගෝවා?පුත්තලමේ?
හ්ම්ම්ම් ..මේවා හොඳට පැළවෙනවා,සරුසාරෙට,උඹේ ගෙටත් වඩා උස ගෝවා ගෙඩි..ඒ මොකෝ දන්නවද?
නෑනේ
උඹ අහලා තියෙනවද කතාවක් "අස්ථීර ලෝකය තුළ ස්ථීර ප්‍රේමයක් සෙවිය හැකිනම් පුත්තලමේද ගෝවා වගා කළ හැකිය " කියලා?
මං ආපහු කුඩය ඉහලගෙන පාරට බැස්සා..

Read More

එක්ස්කූස්මී ස(ර්) වී ආර් ලොන්චින්(ග්) අ නිව් ප්‍රඩක්ට් (Excuse me sir ,We are launching a new product )

"ආආඅහ් මල්ලියා හයර් එකක්..ටුක් ගාල ගිහින් එන්නම් අරි"
හන්දියේ ත්‍රීවිල් පද්මෙ අයියා ස්වකීය ලැම්බොගිනී රථය මහ පාරට ගෙන ඇන්ජිමට බර දමා පිටව ගියේ ජනේලයෙන් අතක් එළියට දමා මටද ආචාර වෙඩිමුරයක් පත්තු කිරීමෙන් පසුවය.රථය පිටුපස ලොකුවට නිල් පාටින් ගසා තුබුණු

"අත හිත නැන්දම්මාගෙන් " 

වචන පේළිය මත ඇස් අලවාගෙන සිටි මට පිටුපසින්

"එක්ස්කූස්මී මිස්ට(ර්) "

 යනුවෙන් හඬක් ඇසුනද ,එය කනට හරිහැටි වට්ටා නොගත්තේ කාරය දෙසටම අවධානය යොමුව තිබූ නිසා නොව මා මිස්ට(ර්) නොවන නිසාය.මා ගැටයාය.
නැවතත් එයම ඇසිණ,නමුත් ඉදිරිපසිනි.

"එක්ස්කූස්මී ස(ර්)

අරෝහ පරිණාහ සම්පන්න,මනාසේ වැඩුණු අග පසඟැති කඩවසම් කෙල්ලෙකි.ටිකිරිලියාගේ ළිඳ වටකළ කබරගොයා මෙන් කෙල්ල වට කරගෙන උන් කොල්ලෙකි.
"එක්ස්කූස්මී මිස්ටර් ,වී ආර් ෆ්‍රොම් අපරබාග කන්සුයුමබල් හර්බල් මල්ටි විටමින් මල්ටි බැරල් ප්‍රොඩක්ට්ස් ප්‍රයිවෙට් ලිමිටඩ්..කැන් වී හැව් අ මිනිට් "
අහස් කුස හරහා ඈතට ජෙට් යානාවක දුම් පාරක් වැටී තිබුණි,ගොලුබෙල්ලෝත් එසේමය.යන පාරේ උන් සාරු දම දම යති.ගොලුබෙල්ලක් වගාවකට හානි කර සත්ව විශේෂයක්  බව බොහෝ පරිසරවේදී.......
"සර් ,කැන් වී..? කැන් වී හෑව්"
ගැස්සී නැවතත් පහළ බැලූ කල්හී මා ඉදිරිපිටම සිටියේ අරෝහ පරිණාහ සම්පන්න,මනාසේ වැඩුණු අග පසඟැති කඩවසම් කෙල්ලෙකි.ටිකිරිලි.....
"සර් ,අපේ කම්පනි එකෙන් නෙක්ස්ට් ඉයර් එකට ප්‍රොඩක්ට් රේන්ජ් හඳුන්වලා දීලා ශ්‍රී ලංකා ඉකොනොමි එක අපේ ග්‍රහණයට අරගෙන නිවාස අඩස්සියේ තියාගන්ඩ අපි බලාපොරොත්තු වෙනවා "
"සූරසේන? " ඈ ඉන්පසුව ළඟින්ම උන් කොල්ලාට තවත් ඉංග්‍රීසි වචන කිහිපයක් උච්ඡාරණද සහිතව හඳුන්වාදීමට අවස්ථාව ලබා දුන්නාය.
"තෑන්ක් යූ  විමලාවතී" ඕනෑවට වඩා ආචාර සම්පන්න වූ සූරසේන කරේ දමාගෙන උන් බෑගය තුළින් ලැප්ටොප් එකක් ගෙන එය ෂට් අප් කළේය. (සාමන්‍යයෙන් පරිගණකයක් පණ ගැන්වීම ඉංග්‍රීසියෙහි ෂට් අප් -shut up-ලෙස හැඳින්වෙන අතර ,පණ නැසීම ෂට් ඩවුන් -shut down- වේ )

තවත් බෑගයක් තුළින් මල්ටිමීඩියා ප්‍රොජෙක්ටරයක් එළියට ගත් ඔහු එයද කරකවා ඔන් කර ( ට(ර්)න් ඔන් )පරිගණක තිරය එහා පැත්තේ කඩේ බිත්තියට ප්‍රොජෙක්ට් කර සිය දේශනය ආරම්භ කළේය.
"ඇත්තටම  නව නිශ්පාදනයක් වෙළද පොළට නිකුත් කිරීම නැමැති ප්‍රස්තුතය සළකා බැලීමට ,එම ප්‍රපංචය දෙස විශ්ලේෂණාත්මකව බැලීමේදී....."
මම ඔහුට ආදරය කිරීමට පටන් ගත්තෙමි.රට දැය සමය නගනු වස් ලක් මවුනට අවැසි මෙවැනි නහර වැලක් වැලක් පාසා ගලන සෑම රුධිර බිඳුවකම සිහළකම මුසු වුනු සිහළ.....
"ඉන් දැට් කේස් වී කැන් කන්සිඩර් දිස් ඈස් අ සයිකල්..විච් වී කෝල් ද ප්‍රඩක්ට් ඩිවෙලොප්මන්ට් ලයිෆ් සයිකල් ..."ඔහු නැවත කතා කළේය.
සිහළුන් නසනු වස් මේ මොහොතේත් ක්‍රියාත්මක වන විජාතික බලවේග අමතක කිරීම නොමනාය.

(image-http://www.exant.co.in/Product-Development.aspx)

අපිට මොකක් හරි ප්‍රොඩක්ට් එකක් ඩිවලොප් කරන්න යූෂුවලි රික්වයාමන්ට් එකක් තියෙන්ඩ ඕනෙ..ඒ කියන්නේ සමාජයේ ඒ ප්‍රොඩක්ට් එකට අවශ්‍යතාවයක් තියෙන්න ඕනෙ.Requirement gathering  එකෙන් කරන්නේ ඒ අවශ්‍යතා හොයන එක.
උදාහරණයක් විදියට මිනිස්සුන්ට පයින් යන්න අමාරු නිසා අපි කාර් කියන ප්‍රොඩක්ට් එක ඩිවලොප් කරනවා.ඒ වගේ  ප්‍රොඩක්ට්ස් වලින් එකෙන් මිනිස්සුන්ට තියෙන අවශ්‍යතා උවමනා පිරිමැහෙන්ඩ ඕනෑ.දැන් බලන්ඩ මිනිස්සුන්ට බඩගිනිනම්?

"ලොකුවට පාරවල් හදන්න ඕනෙ" මම වහා පිළිතුරු දුන්නේ ඕලෙවල් සමාජ අධ්‍යයනය ෆේල් වුවත් සමාජය ගැන දන්නා නිසාය.

"හරියට හරි එතකොට පුලුවන් රූරල් ගොවියන්ට තමන්ගෙ බෝග ඉක්මනට ටවුන් ගේන්න"

"එතකොට මිනිස්සුන්ගේ කරදර,ස්ට්‍රෙස් ඔක්කොම නැති වෙන්න ඒ අයට සන්තෝසයක් ,හෝප් එකක් ගෙනල්ල දෙන්න ඕන නිසා හැදුවා "

'ඔව් කියන්න බලන්න ..." ඒ කෙල්ලය

"හරි ලේසියි..."

"අනේ කියන්නකෝ...ඒක බොක්ස් එකක් වගේ එකක්" කෙල්ල තොඳොල් වූවාය.

"ම්ම්ම්ම්ම් චන්ද පෙට්ටිය?"

"ඇහ් වට්? මම කිවුවෙ ටෙලිවිෂන් එක ගැන"

"ඉතින් අපි අපේ ප්‍රොඩක්ට් එකක් රිලීස් කරන්න කලින් මිනිස්සුන්ට ඕනෙ මොනවද කියලා හොයල බලන්ඩ ජුන්ඩි මාකට් ස(ර්)වේ එකක් කරනවා .ඒකට තමා අපිට මිස්ට(ර්) ගේ හෙල්ප් එක ඕනෙ..

දැන් මෙය දුර දිග ගියා වැඩිය..පේන හැටියටනම් බෙල්ල ගහල යන වැඩකි.නැත...මට කාරණය සිහි විය.වහා කොල්ලාගේ කර උඩින් එබී පාරේ අනිත් පැත්ත බැලීමි.රතු පාට ෆෙරාරි රථයක් ඩිකියෙහි සෝ කේස් එකක් තබාගෙන ඉස්පන්චි,කිඹුලා බනිස්,ලැවරියා විකුණමින් සිටි මිනිහා සැකකරු අංක එකය..මම වහා ෆෙරාරිය ළඟට ගොස් ඇතුළට එබී බැලුවෙමි.බනිස් මුදලාලි කිඹුලා බනිස් එකක් පෙන්නමින්  මට අතවර කිරීමට තැත් කළේය..මම අමාරුවෙන් කෝප මුහුණක් ලබා ගත්තෙමි.

"කෝ කැමරාව?"

"මොන කැමරාවද?" මුදලාලි වයර් විය.

"ඇයි දැන් මේක ඇතුළෙ හංගලා තිබ්බ කැමරාව?..මම එච්චර නරක නෑ..ඒත් නරක මිනිහා නොකර කියපිය"  

"මොන කැමරාවක්ද ඩෝව්...කැමරා ගන්න සල්ලි කොහෙන්ද..මොකෝ බදු බැස්සුවයැ?මෙහෙ නිකන් සද්ද බද්ද දැම්මොත් තෝවත්  කෑලි කරලා මාළු බනිස් එක ඇතුලට දාල විකුණනවා අරි?"මට ඔහුත් සමඟ සටන් විරාම ගිවිසුමකට අත්සන් කිරීමට හැකිවූයේ කිඹුලා බනිස් 8ක් ,සීනි බනිස් 4ක් සහ ලැවරියා 11ක් ගැනීමෙන් පසුවය

මම ලැවරියා එකක් කමින්ම පාර පැන ,කිඹුලා බනිස් එකක් අර කෙල්ලට දික් කළෙමි.

"ඔයාලා හිනා ඉනා එකෙන් නෙවේද?"

මතු සම්බන්ධයි !

ප්‍රශ්නය -සූරසේන මහ පාරේ ප්‍රොජෙක්ටරය පණ ගැන්නුවේ කෙසේද?

Read More

උඹ නටද්දි පපුවෙ කරකැවෙන ගිනිබෝල

පෙරහැරේ බෙරකාරයන් තාලෙට අල්ලන බෙර පද වලට උඩ පැන පැන උඹ නටන හැටි බලන් ඉන්දැද්දි,ගිනිබෝලකාරයන්ගේ ගිනි බෝල කැරකුනේ පෙරහැරේ නෙවේ මගේ පපුව ඇතුළෙයි කියලා උඹනම් දැනන් ඉන්ඩ නැතුව ඇති...ගිනි බෝල උනත් ලස්සන නිකං තියෙද්දි නෙවේ,කැරකෙද්දි හින්දම ඔන්න ඔහේ ඩිංගක් කැරකුනත් මොකෝ කියලා හිතුණත් උඹ ඒ ගින්නටම තවත් ලාම්පුතෙල් වක් කර කර කරකවන්ඩ හදද්දි තමා මට ඉවසුම් නොදෙන්නෙ..

පෙරහැර බලන්ඩ ආපු නොසන්ඩාල කොල්ලො රෑනක් උඹට නොමනා විහිළු කරද්දි ,එවෙලේ නැගලා උන්නු ගහෙන් බැහැලා ඇවිදිල්ලා කන පොඩි වෙන්න දෙකක් දෙන්ඩ හිතුනත් උඹ උන් දිහාට දාපු එක බැල්මෙන්ම උන් හැත්ත බුරුත්තම අළු වෙලා අඟුරු වෙලා ගියා.අපි ඒ අඟුරු ගන්න ඉන්නේ උදේට දත් මදින්න

මමත් උඹේ නැටුම් බලන්ඩ ළඟටම  නෑවිදින් ගහට වෙලා උන්නෙ අඟුරු වෙන්ඩ තියෙන අකමැතිකමකට නෙවී.(ඒත් උඹේ ඇස් දේකේ කාන්තියට ඒක කොහොමත් වෙන බැව් නම් ඒකාන්තයි,ස්තීරයි.ශ්‍රී එෆ්.එම් ඉරිදා නිධානය වගේ).මට ලජ්ජ හින්දයි 

උඹ කඩේ කැසියර් කූඩුවෙ ඉන්නකොට මං සමහරක් දවස්වලට පත්පාඩගම් පැකැට් එකක්,පැනඩෝල් පෙත්තක් ඉල්ලගන්ඩ එන්නේ අඩුම ගානේ උඹ ඇයි අයියට සනීප නැද්දැයි කියලවත් අහයි කියලා හිතලයි.ඒත් උඹ එහෙම නාහන්නෙ මට තියෙන අනාදරේකට නෙවේය කියල මම දන්නවා.උඹ හිතන්නේ ඒවා අපේ ආච්චිට කියල වෙන්ඩැ.ආච්චිත් කොච්චරවත් කියන්නේ උන්දැ මියැදෙන්ඩ කලින් මුණුබුරෙක්ගෙ මූණ බලන්ඩ ඕනය කියල.(ඒක කිවුවෙ උඹේ දැන ගැනීම පිණිස.)

තවත් සමහරක් දවස්වල මම වචනයක්වත් උඹ එක්ක දොඩනවා කියලා හිතාන ගාමිනී ෆොන්සේකා මහත්තය වගේ තමා කඩේට ගොඩ වෙන්නේ..ඒත් අන්තිමට පහු බහින්ඩ වෙන්නේ කෝපි කඩේ සුගතං වෙලා.උඹ ඉස්සරහ ඉන්දැද්දි මගෙ දිව ගොළු වෙනවා නංගියේ ...කවුදෝ එකෙක් මගේ දිව ඇදලා අරගෙන කඩේ වතුර රත් කරන බොයිලේරුවට ගැට ගහල වගේ දැනෙන්නෙ ඒ වෙලාවටයි.එතැනින් පස්සෙ ඉතින් කිය උනත් කියවෙන්නේ රාක්කෙක ,සෝ කේස් එහෙක අඩුක් කරල තියෙන බඩුවක නමක් මිසක්ක "කොහොමද නංගියේ?කෑවයි?" වගේ එකක් නෙවේ.උඹත් ඉතින් කිසිම ගානක් නැතුව ඉල්ලපු ජාතියම දෙනවා.සල්ලිත් අරන් ලෝබ නැතුව ඉතුරු සල්ලිත් දෙනවා.කිවුවාම විස්වාස කරහං නංගියේ දැන් මයෙ කාමරේ තියෙනවා උඹලගේ කඩේට වඩා බඩු මුට්ටු.මාත් පස්සෙ දවසක කඩයක් දාන්ඩ තමා හිතන් ඉන්නේ. කැසියර් කූඩුවෙ තියන්ඩ කවුරුත් තමා නැත්තෙ තාම. 

උඹ ඇයි නංගියේ මයෙත් එක්කලාවත් කතා නොකරන්නේ?අඩුම ගානේ එදා කලබල වෙච්චි වෙලාවක  පුළුන්ද කොහෙද පුරෝපු රෝස පාට  පැකැට් එකකට වැරදිලා ඇගිල්ල දික් වෙලා ඒක සල්ලි දීල ගත්ත වෙලාවෙවත් හිකි හිකි ගගා හිනා වෙවී හිටිය මිසක්ක වචනයක්වත් නොකිවුවෙ ඇයි?කොල්ලො තාම මට අනන් මනන් කියනවා.

කොයික කෝම උනත් කමක් නෑ නංගියේ .මන් දන්නවා උඹ ඔය පේන තරං නපුරු නෑ කියලා.මං ඒ හැටි පෙනුමක් නැති,ඒ හැටි සල්ලි බාගෙත් නැති එකෙක් වග හැබෑව.ඒත් උඹව හැමදාම සන්තෝසෙන් තියන්ඩ පුළුවන් වග මම දන්නවා.හම කළු උනාට උඹේ ඔය කිරි සුදු පාට දත් ටික පෙන්නුව ගමන්ම මුළු ගේම එළිය වැටේවි.ගමට ලයිට් ඉල්ලල අර අවලං මන්තිරිය පස්සෙ යන්න ඕන නෑ එතකොට.

උඹේ ඔය හිකි හිකියත් එක්ක කිචි බිච්චියත් එක්කහු උනාම මුළු ගේම ඒ සද්දෙන් පිරිලා ඉතිරිලා යාවි .එතකොට රෙඩියෝ ඕනෙත් නෑ.දැක්කනෙ උඹ ළඟ ඉන්නවා කියන්නේ වියදම් අඩුයි.සල්ලි බාගේ නැති උනත් මන් අනිත් උන් වාගේ දෑවැද්ද ඉල්ලන්නෙත් නෑ උඹේන්..ඕනමනම් අර දුඹුරු පාට බලු තඩියා ගෙනාවට කමක් නෑ.හැබැයි ඌව ගැටගහල තියමු.

මං මේක ලියන්නේ පෙරහැර බලලා ගහෙන් බැහැලා ආ ගමන්මයි

උඹ ඉන්න හරිය පහු උනාට පස්සෙ පෙරහැරේ බෙරකාරයෝ හරියට පදයක් ගැහුවෙම නෑ.තාලයක් නෑ

නැට්ටුවො අඩි වැරැද්දුව.එකෙක් පැටලිලා වැටුන

අලි ටිකත් හෝන්දු මාන්දු වෙලා

නිළමෙතුමා ගියේ රුවිතෙට...

උඹ යන්න ගියොත් මගේ ජීවිතෙත් එහෙම වෙයි නංගියේ

තාලයක් නෑ..වැරදෙනවා..හෝන්දු මාන්දු ..රුවිතෙ...

ප.ලි

අපේ පැට්ටේරියෙ ඉන්නවා හොඳ මහත්තයෙක් ඔය එකකෙක එව්වා ලියන..පත්තර පොත් හෙම නෙවේ.බ්ලොක් ද මොනාද.ආන්න එයා තමා කිවුවේ උඹ ඔහොම පිනා වගේ කට පියාගෙන ඉඳලා හරියන්නේ නෑය කියලා


photo credit http://www.flickr.com/photos/hhsp/6068837606/

තදියමේ ලියන ලිවිල්ලේදී මිස්ටේක් එකක් වී ඇති බව කණගාටුවෙන් දැනුම් දෙමි
"ආච්චිත් කොච්චරවත් කියන්නේ උන්දැ මියැදෙන්ඩ කලින් මුණුබුරෙක්ගෙ මූණ බලන්ඩ ඕනය කියල"

පෙන්නා දුන් ජනිත සහෝදරයාට තුති

නිවැරදි
"අම්මත් කොච්චරවත් කියන්නේ උන්දැ මියැදෙන්ඩ කලින් මුණුබුරෙක්ගෙ මූණ බලන්ඩ ඕනය කියල"

සමාව ලැබේවා !

Read More

දර්පණා විවාහෝත්සව ප්‍රතිජනන ව්‍යාපෘතිය (ආච්චිට වෙඩින්(ග්) ගැන කියා දීමට සොඳුරු උත්සාහයක්! 2)

ආච්චිට වෙඩින්(ග්) ගැන කියා දීමට සොඳුරු උත්සාහයක්! හා සම්බන්ධයි

ආච්චිගේ කැමත්ත ටෙලිපති ක්‍රමයෙන් විකාශය විය.
අසීරු අභියෝගයක් වුවද බාරගැනීමට කිසිඳු චකිතයක් ඇති නොවූයේ සිත ඇත්නම් පත කුඩා නැති වග සිහිපත් වීමත් සමගය."පත"යනු "විශාල ,ලොකු" යන වචන වෙනුවට සාමාන්‍ය ව්‍යවහාරයේදී පෘතග්ජනයන් යොදා ගන්නා වචනයයි.එය කිසිසේත්ම කුඩා නැත.

මම "විවාහෝත්සව ප්‍රතිජනන ව්‍යාපෘතිය" වෙඩින් කාඩ් වලින් පටන් ගතිමි.දැනටමත් පරිවාර ජනයාට ඒවා යවා ඇති වග සැළවූ කල්හී මම එයින් එක් නියැඳියක් ගෙන විශ්ලේෂනය කර බැලුවෙමි.අහවලාගේ සහ අහවලීගේ දොණියන්දෑ වන..........සිංහල අකුරු දුටු මට නැවත ඔක්කාරය සහ හුස්ම ගැනීමේ අපහසුතාවයක් මතුවිය.පහ වසර ශිෂ්‍යත්ව ප්‍රශ්න පත්තරය මෙන් වෙඩින් කාඩ් එකත් කලින් පිටවී ඇති වගට රාවයක් යවා නව කාඩ් එකක් මුද්‍රණය කිරීමට අණ කළෙමි.ඉංග්‍රීසි නොදන්න නිසා නොව, දාඩිය මුගුරු හෙළමින් වෙබ් අඩවි වල ලියන සාමාන්‍ය මනුෂ්‍ය ජීවිතයක් නොළද හාදයන් වෙනුවෙන්, කාඩ් එකෙහි මුද්‍රණය කරන පාඨය වෙබ් අඩවියකින් සම්පේෂණය කළද ,ඉංග්‍රීසියෙන් පමණක් ලිවීම අවුරුදු දෙදහස් පන්සීයක ඉතිහාසය නැමැති කෞතුකාගාරයේ කඩු සොරකමක් යයි පවසමින් ආච්චි ඇතිකළ ගාලගෝට්ටිය සමනය කිරීමේ අරමුණින් ඉතා පහසුවෙන් එය සිංහලයටද හැරවීමි.

After some years of savings and sacrifices, we have finally gathered enough money to celebrate our wedding like we always wanted: a big party and many guests. We count on you being with us, along with your gift,of course.

love you all to honor us with your presence and to be witnesses to our union.

අවුරුදු ගණනාවක ඉතිරි කිරීමේ ගිණුම් සහ බිලි පූජා වලින් පසු අපි  කැමති ආකාරයට, හැමදාම විවාහ වීමට ප්‍රමාණවත් මුදල් ප්‍රමාණයක් ගොඩ ගැසුවෙමු.ලොකු සාදයක් හා අනුමාන කිරීම් රැසක්.ඔබ  තෑගි සමඟ තනියම සිටීදැයි දැන ගැනීමට අපට පාඨමාලාවක් තිබේ.
අපගේ වර්තමාන වෘත්තීය සමිතියට ගෞරවනීය සාක්කිකරුවන් ලෙස පැමිණෙන ඔබට අපි ආදරෙයි !

ලැජ්ජාව අඩකින් පමණ අඩුවී ඇත.දැන් "හුටට්ටන්ට" බෑන් චූන් කණ්ඩායම පිටුවහල් කොට ඩී.ජේ සංස්කෘතික බීජ මගුල් ගෙදර මත රෝපණය කළ යුතුය.කිරට උයපු කීරමින්,පොළොස් මාලුව,පිපිඤ්ඤා සලාද,බටු මෝජු වෙනුවට නව ආහාර ප්‍රතිපත්තියක් බිම් මට්ටමේ සිට ස්ථාපනය කළ යුතුය.තට්ටු අටේ කේක් එකක් , කැරට් විසි හතරේ පෝරුවක් ,අමුත්තන්ට ගැවසීමට රෙදි හට් 5ක් ,ගෙදර සිට කිලෝමීටර් දෙකක් එක දිගට දැමීමට සිංහ කොඩි ,බෞද්ධ කොඩි,බස්නාහිර පළාත් සබා කොඩි යනාදිය එකතු වූ කල්හී ලිස්ට් එක දික් වන්නට විය.ගෙදර තිබුණු ඇන්ටික් බඩු වෙනුවට අලුත් ගෘහ භාණ්ඩ කුළියට ගෙනාවෙමි.කෙසේ වුවද හනිමුන් සඳහා මග කැඩෙන ,පිට පොත්ත හොඳ කාරයක් අඩු ගානට ගැනීමට සියලු පාර්ශවයන් පොළඹවා ගත්තෙමි.ජෝඩුව යහතින් හනිමූන් යනවා බලාසිටීමට මට බැරිය.

මම දර්පණා සිටින පළාතකවත් නොයන්නට තීරණය කළෙමි.සමහර විට ඈ මා දුටුවහොත් මේ කරගන්නට යන මඟුල ගැන පසුතැවිල්ලක් ඇති වනු ඇත.හැඬූ කඳුලින් පෝරුවට නගිනු ඇත.මනමාල පාර්ශවය වෙන එකක් හිතනු ඇත.මඟුල කෙළවනු ඇති අතර ඒ පව මගේ කර පිටට වැටෙනු ඇත.කෙසේ වුවද ඇය ප්‍රශස්ත මට්ටමින් එදින පෙනී සිටිනු දැකීමට කැමත්තෙන් මම නම ගිය බියුටි කචල් ආයතනයක්ම ගෙන්නුවෙමි.රෑ තිස්සේම රන්දෙනිගල සටනේදී මෙන් ආයුධ ගැටෙන හඬවල් ඇගේ කාමරය තුළින් ඇසෙන්නට විය.දර්පණාගේ නියපොතු උගුල්ලා,රෝම කූප සමතලා කොට මුහුණේ කටාරම් කොටා , රෙදි මදින්න තිබුණ ඉස්තිරික්කයෙන් කොණ්ඩේ රැළි ඉවත් කළ වග විශ්වාස කටයුතු මාර්ගයකින් දැනගන්නට ලැබිණ.

"අනිද්දා" හිතුවාටත් වඩා කලින් උදාවිය.මඟුල් ගෙදර නේක නේක සිරියාවන්ගෙන් බබලන්නට විය.ආරම්භයේ සිටම ඡායාරූප ශිල්පියාගේ හැකියාවන් කාගෙත් සිත් ගන්නා ලදී.හෙතෙම "හොඳ ඈන්ගල්" සොයනු වස් කලිසම උඩට නවාගෙන පොල් ගහකට නැග්ගේය.තලගොයෙක් මෙන් බිම බඩගෑවේය.ජෝඩුව තුන් පාරක් පෝරුවට නංවා දෙපාරක් මුදු පැළැන්දවූයේ කපු මහතාගේ විධායක බලතල අහෝසි කරවමිනි.ජය මංගල ගාථා කීවේ ජෝඩුව කැන්දන් එනවිට වඩිග පටුන(නැටුමේ නම හරියටම දන්නේ නැත.කුලියට ගෙන්නූවේ මිල්ක්වෝර්ම්ස් නර්ථනාගාරයෙනි )  නැටීමටද සිටි කන්‍යාවියන්ය.ඉන් එකියක් වයර් එකේ ධන  රින මාරු වී ළමා සාරිය පිටින් වඩිග පටුන නැටුවාය,වඩිග පටුන කොස්ටියුම් එකෙන්ම පෝරුව ළඟ හිටගත්තාය.
    ජෝඩුව පෝරුවෙන් බැස්සීමෙන් පසු සමූහ ඡායාරූප වලට පෙනී සිටියහ.සෙකන්ඩ් මනමාලියන් සහ මනමාලයන් ජොඩු 4 සහ මල් කුමාර කුමාරියන් ජෝඩු පහ ඒකරේඛීයව සිටුවීමට සාලයේ ඉඩ මදි වීම නිසා අමුතුම කෝනයකට පිරිස සැකසීමට කැමරා මෑන්ට සිදුවිය.හොඳ ප්‍රොපෙසනල් පොරක් ගැනීම නිසා වැඩේ හොඳට ගිය අතර අන්තිමේ මනාල ජොඩුව , සෙකන්ඩ් මනමාලයෙක් සහ මල් කුමාරියකින් රීප්ලේස් වී තිබිණි

තට්ටු අටේ කේක් ගෙඩිය ලාස් වේගාස් වල වාසනාව උරගා බැලීමේ යන්තරයක් මෙන් විය.ජැක්පොට් එක ඇදුනු සමහරු "කේක්" කෑහ.සමහරු රිජිෆෝම් කෑහ.ඉතුරු  අය කේක් එකට ලයික් එකක් දමා ෂෙයා(ර්) කළහ.

කෑම පෝලිමට වේගයෙන්ම දිව ගියේ ෂෙයා(ර්) කළ උදවියයි.බත් තොග සීමිත වූ බැවින් ඉක්මනින්ම අවසන් විය.ප්‍රමාද වීමේ ආදිනව පෙන්වා දෙනු පිණිස සිලින්ඩරාකාර ජටා පැළඳ සිටි කෝකියන් විසින් අමුතුම ආකාරයේ කෑම ලබා දුන්හ.සීයා ඔහුට ලැබුනු සලාද කොළ ,බීට් අල අඩුක් කළ පිපිඤ්ඤා ගෙඩිය දෙකට පළා ඇට ටික ගෙනගොස් වත්ත පහළ සිටවූයේය.සමහරු අයිස් වලින් සෑදී ලොකු ඩොල්පිං මාළුවා දෙස පෙරේතකමෙන් බලා සිටියහ.

ඉන්පසු සියල්ලෝම ඩී.ජේ සංගීතයෙන් මුසපත්ව,නසරානීව මද පවනේ සැලෙන්නට වූහ.සියල්ලෝම සතූටිනි.මට මහත් ආඩම්බරයක් දැනුනි.වියදම ටිකක් සැරය,නමුත් වැඩේ හොඳය.මම ආච්චි මුණගැසී අයවැය වාර්තාවක් සැපයීමි.ආච්චි ප්‍රශ්නයක් ඇසුවාය.

"මෙහෙමද පුතේ දැං ලංකාවේ මගුල් කන්නේ?"

"ඔව් ආච්චියේ මේක තමා ක්‍රමේ..ත්‍රේන්ඩ්"

___________________________(හිස්තැනක්) 

( ආච්චි කිවුවේ කුමක්ද? )

Read More