May 29, 2011

ආයෙමත් හෝම්ස් (තුන ).ඔහුයි-මමයි

පවිත්‍ර හෝම්ස් මා දෙස බලා කී පළමු "සාස්තරයට" පරීක්ෂාකාරී ලෙස මුහුණ දී "ජාමේ " බේරාගත්තද ,එය මේ සිද්ධිවල අවසානය නොවීය.ඔහු දිගින් දිගටම මගේ අත පය ,මුහුණ,කට, තෙරපමින්,පිරිමඳිමින්,හූරමින් අනීවාරතේ කාලය ගතකරන්නට විය.එක පැයක් තුළදී මම දියවැඩියා රෝගියෙක් ,යුධ සිරකරුවෙක් ,පත්තරකාරයෙක් වීමි.ඔහු මගේ බෙල්ලේ උපන් ලපයක් දෙස බලා මගේ උපන් ස්ථානය කීවේය.රදනක දතක් දෙස බලා අක්කාගේ වයස කීවේය.(මට අක්කා කෙනෙක් නැත )  .මේ සියලු "විගඩම් " අවසානයේ මම ඇත්තම උන්මන්තකයෙක් වීමි.නමුත් එවිටත් ඔහු කීවේ මගේ මොළයේ පළල අනුව මා මහා බුද්ධිමතෙක් විය යුතු බවයි.
කෙසේ වුවද මේ "ඇඟ බලා සාස්තර කීමේ ක්‍රමය " ගැන මගේ හිතේ පහළ වූවේ ලොකු කුතුහලයකි.මම මේ ගැන පවිත්‍රගෙන් විමසූ කල ඔහු දිග හෑල්ලක් මා ඉදිරියේ දිගහැරියේය.ඒ හෑල්ලේ හැමතැනකම පාහේ "හෝම්ස්' යන වචනය තිබූ බැවින් මම හෝම්ස් ගැන විමසුවෙමි .එහි ප්‍රතිඵලය වූයේ තවත් දිග හෑල්ලකි !. මම මගේ ලෝකයක තනිවී ඔහු දෙසම බලා සිටියෙමි.තව තවත් හෑලි මා පසුකරමින් මටත් නොකියාම පිටව ගියේය .ගඟට ඉනි කැපීම නිශ්ඵල ක්‍රියාවක් බව ඔහුට තවමත් වැටහී නැත්තා සේය.
ටිකකින් පවිත්‍ර  පුටුවේ ඇළ වී, දිග හැරි දෙපා තවත් පුටුවක් මත තබා ගත්තේය.ඉන්පසුව සාක්කුවෙන් එළියට ගත්තේ වෙන කිසිවක් නොව පරණ "දුම් පයිප්පයකි"!. "එන පොට " එතරම් ශරීර සුවදායක නොවන බව මට යන්තමින් වැටහුණි.
ඔහු හිස් පයිප්පය උරන්නට විය !
"ලන්ඩන් වල බ්‍රැඩ්ලෝ  සාප්පුවේ වගේ හොඳ දුම්කොළ මෙහෙ නෑ.ඉතින් මෙහෙම හොඳයි " පවිත්‍ර "මනෝමයෙන් "කටින් දුම් පිටකළේය .
"හැහ්...ලන්ඩන් ? බ්‍රැඩ්ලෝ  ?" මම ඒ "මනෝ "දුම් පාර වැළැක්වීමට නාසය වසාගනිමින් ඇසුවෙමි .
"ඔබ බ්‍රැඩ්ලෝ  සාප්පුව ගැන දැන ගන්න කිසිම මාර්ගයක් නෑ මගෙ මිත්‍රයා.ඒක ෂර්ලොක් හෝම්ස්ගේ සිත්ගත් දුම්කොළ විකුණපු තැනක්."
මට අද සිහිනෙන් පවා "හෝම්ස්"යන නම ඇසෙනු ඇත.ඒ තරමටම පවිත්‍ර මගේ මොළය සෝදා තිබේ .නමුත් මට මෙය හරිහැටි වටහාගැනීමට වුවමනා විය."මම මේ නිකන් අහන්නේ මොකද ඔච්චරම කියවන්නේ හෝම්ස් ගැන?"
පවිත්‍ර දැහැනකට සමවැදිනි.ඔහුගේ අඩක් වැසුණු ඇස් පිහාටු තුළින් පෙනුණු ඇස් දීප්තිමත්ව බබලන්නට විය.
"ෂර්ලොක් හෝම්ස් කියන්නේ මගේ මේ පුංචි ලෝකයේ වීරයෙක්. මම කන්නෙත් ,බොන්නෙත් ,ඇවිදින්නෙත් ,හිතන්නෙත් ඔහුත් සමඟ.ඔහු හිතන ,පතන ඕනෑම දේකට මම එකඟයි.ඔහු හරිම තර්කානුකූලයි,අවංකයි. ඔහු,ඔහුගේ,ඔහුට....ඔහු,ඔහුගේ,ඔහුට ....ඔහු,ඔහුගේ,ඔහුට මට නැවතත් අර පරණ හින්දි චිත්‍රපටියේ ප්‍රේම ජවනිකාවක් සිහිපත් විය.
මට සමහර වෙලාවල හිතෙනවා මම ෂර්ලොක් හෝම්ස් කියලා !!
"ඔය හෝම්ස් කියන හාදයා ඇත්තටම ඉඳලා නෑලු නේද?" ඒ මමය.
"ඔහු මගේ ලෝකයේ ජීවමානයි." ඒ ඔහුය.
ඉන්පසුව මගේ දෙකන් තුළින් දීර්ඝ පොත් ලැයිස්තුවක් හමා ගියේය.
වික්‍රමය...අභිරහස....රහස.....අනාවරනය....සොයාගැනීම...
"මම මගෙ මිත්‍රයාට මේවායින් කිහිපයක් ගෙනත් දෙන්නම්."
මම නොදැනුවත්කමින් හිස සැළුවෙමි.
සංවාදය අවසන් විය.
පවිත්‍ර ඔහුගේ ගෙදර ගියේය
මම මගේ ගෙදර ගියෙමි.
පවිත්‍ර පසුදින පාසල් ආවේ නැත.
මම පසුදින පාසල් ගියෙමි.
පවිත්‍ර තවමත් හෝම්ස්ය
මම තව දුරටත් "මම" නොවීමි.
අලුත් නාමකරණයකි
මම දැන් "දොස්තර වොට්සන්ය".!!!

Share:

May 25, 2011

පෙරවදන

සිංහල භාෂාවේ වැඩිය පේන්න නැති වචනයක් වන ,"අනීවාරතේ" යනු "නිකරුණේ" යන තේරුම දෙන වචනයකි හා හා පුරා පටන් ගත් මංගල බ්ලොගයට අනීවාරතේ  නමක් යොදා ගැනීම මගේ මානසික තත්වය හොඳාකාරව හෙළිකරන සාධකයක් බවට ඔබ සළකනු ඇත .නමුත් මෙම බ්ලොගයට තේරුමක් ඇති නමක් සෙවීම අනීවාරතේ කාලය නාස්ති වෙන වැඩකි .ඒ මක් නිසාද යත් මගේ හිතේ පහළවූ සහ පහළවීමට නියමිත නොයෙකුත් දේ මෙහි ඉවක් බවක් පාලනයක් නැතිව පළ වීමට ඉඩ ඇති හෙයිනි .ඒවායින් බොහොමයක් තේරුමක් නැති නොහොත් "අනීවාරතේ" දේවල් වන බව පැවසීමට අනාගතවක්තෘවරයෙන් වුවමනා නැත .
… කෙසේ වුවද ඔබත් කලු වලාවක් දුටු කල එහි රිදී රේඛා සොයන ආකාරයේ පුද්ගලයෙක්නම් ,අනීවාරතේ පහළ වූ අදහස් ගොන්නෙන් යමක් උකහා ගැනීමට ඔබ උත්සහ දරනු ඇත. නමුත් ඒ සඳහා කිසිදු වගකීමක් මා විසින් නොදරන බවද සිතෙහි තබා ගැනීම වටී ......
එච්චරයි
Share:

May 18, 2011

ආයෙමත් හෝම්ස් (දෙක ) :ඔහු සහ මම

(දෙවෙනි කොටස ගැන බලාපොරොත්තුවක් නෑ කිවුවට මොකෝ ප්‍රතිචාරත් හොඳ නිසා මෙන්න දෙක.අදහස් දීපු,දිරි ගන්වපු හැමටම ස්තූතියි.)

"හෝම්ස්" යන නම ආදරයෙන් පිළිගෙන මලක් සේ විකසිත වූ පවිත්‍ර ඒ මල පර නොකොට මුලු පන්තියම සුවඳවත් කළේය.නමුත් එම සුවඳ පන්තියේ කා හටවත් එතරම් ප්‍රිය මනාප එකක් නොවීය.කොටින්ම ඔහු හා ආශ්‍රය කිරීමට සූදානම් කිසිවෙක් තවමත් නැත!.එකම ඉරියවුවකින්, එකම තැනකට වී හාවක් හූවක් නැතිව බලාගත් අතම බලා සිටින මේ ආකාරයේ පුද්ගලයන් කොහෙත්ම "හොමෝ සේපියන් " ගණයට අයත් නොවන වග බයෝ පන්තියක  නොසිටි අපටද හොඳින්ම දැනුනු කාරණාවකි.
අප ජීවත්වන මේ ත්‍රිමාන ලෝකයේ හොඳම විහිලුකාරයා දෛවයයි.එකී දෛවයාගේ ඇස් රතු වන විහිලුවකට වාසනාවට හෝ අවාසනාවට මුහුණ දීමට මටද සිදුවිය."හෝමෝ සේපියන් නොවන මානවයා සමඟ කතාබහක් "
එය ඇත්ත වශයෙන්ම සිදුවූයේ අහම්බෙනි.ඒ දෛවෝපගත දිනයේ මම එක් දිශාවක සරල රේඛීය චලිතයක යෙදෙමින් සිටියෙමි.ඊට හරියටම ප්‍රතිවිරුද්ධ දිශාවේ පවිත්‍ර හෝම්ස් චලනය වී ඇති බව මට පසක් වන විට සිදු නොවිය යුතු දෙයක් සිදුවී අප දෙදෙනාම බිම වැටී සිටියෙමු.මා අත තිබූ පොත් මිටිය සී සී කඩ විසිරී තිබිණ.
අපි දෙදෙනාම බිම දණ ගසා ගත්තෙමු.එක් මොහොතකට දෙදෙනාගෙම ඇස් එකිනෙකට සමපාත විය.මම ඔහුගේ  ඇස්වල කාන්තිය රිසිසේ විඳගත්තෙමි.එකම මොහොතකදී එකම පොත අහුලාගැනීමට උත්සහ කිරීම නිසා එක නිමේශයකට අපගේ ඇඟිලි තුඩු එකිනෙක ස්පර්ශ විය.(හින්දි චිත්‍රපටයක ජවනිකාවක් මෙන් පෙනුනද ඇත්ත වශයෙන්ම සිඳුවූයේ මෙවැනි සිද්ධියකි ).
                    "සමාවෙන්න මිත්‍රයා",කතාව ඇරඹුවේ ඔහුය.
ඒ වන විටද අපගේ අත් එකිනෙක ස්පර්ශ වී තිබිණ.ඔහු මගේ අත "පෙරළ පෙරළා "බලන්නට විය.
මම විලිබියෙන් වටපිට බැලුවෙමි!.වාසනාවට පෙනෙන දුරක කවරෙකුවත් නැත.
 "සමාවෙන්න මිත්‍රයා ඔබේ ගමන ප්‍රමාද කළානම්,මම කියන්නේ ඔබේ ක්‍රිකට් පුහුණුවීම ගැන"දෙවන වාක්‍යයත් ඔහුගෙනි.පරණ නවකතාවක දෙබස්!
 "හැහ් ,ක්‍රිකට් ක්‍රි..ක්‍රි ?"මට පෙර මගේ කට ඉස්සර විය.
"ඔව් ක්‍රිකට්..මොකද මිත්‍රයා පුදුමයෙන් වගේ?"
ලෙහෙසියෙන් කට නාරින පුද්ගලයන් කට ඇරිය විට කියවන මනස්ගාත !
"ක්‍රිකට් මේ මම?"
"එක බොහොම සරල දෙයක් මනුස්සයෝ.මෙතනින් ඉඳගෙන කතා කරමු නිවී හැනහිල්ලේ ,ප්‍රමාද නැත්නම් "
මේ වන විටත් අප සිටියේ බිමය.සිතේ තෙරපෙන්නට වූ දැඩි කුහුල නිසාම මම පවිත්‍ර හෝම්ස් සමඟ එක බංකුවක හිඳගත්තෙමි.
"අපේ ඇස් වලට පේන හැම දේකම ,පේන දේට වඩා නොපෙනෙන දේ වැඩියි.ඒවා දැන ගන්න හොඳ නිරීක්ෂකයෙක් වෙන්න ඕනෑ.බොහොම සියුම් නිරීක්ෂණ වලින් ඇදහිය නොහැකි නිගමනවලට එළඹිය හැකියි "ඔහු දේශනය ඇරඹුවේය.නමුත් අවසන් නොකළේය.
"හැම වස්තුවකටම ඊට ආවේණික ස්වාභාව,ගතිගුණ තියෙනවා.මිනිසුන්ටත් එහෙමයි."
බංකුවේ ඉඳගැනීමෙන් මා කළ වැරැද්ද ගැන පසුතැවිල්ලෙන්ම ,හිතට නැගුණු අවංක අදහස් මම ඔහුට ඉදිරිපත් කළෙමි.
"බොරු කියන්නෙ මොකටද මටනම් ඕවා තේරෙන්නේ නෑ"
"ඒක ඔබට විතරක් අදාළ දෙයක් නෙවෙයි .අපි උදාහරණයක් ගනිමු.මම කිවුවොත් මිනිහෙක්ගේ අත් දිහා බලලා එයාගේ රැකියාව ගැන කියන්න පුලුවන් කියලා?මුද්ද දිහා බලලා පවුල් ජීවිතය ගැන කියන්න පුලුවන් කියලා?"
ඊට පිළිතුරක් දීම ලෙහෙසිය ."බෑනේ?"
"ඔන්න වරද්දගන්න තැන.ඔබ ක්‍රිකට් කණ්ඩායමේ ක්‍රීඩා කරන වගත්,අද උදෑසන වැස්සේ කැළණිය ප්‍රදේශය හරහා ආ බවත් නිරීක්ෂණය කිරීමට මට ගතවූවේ මිනිත්තුවක් පමණයි"
මගේ ඇස් දෙකත් ,කටත් එකවර ප්‍රසාරණය විය.කොටින්ම භාෂා විලාශය පවා වෙනස් විය."ඔබ කෙළෙසද එසේ පවසන්නේ මිත්‍රයා?"
"බොහොම සරලයි,නිරීක්ෂණ තුළින් නිගමන වලට.ඔබේ සපත්තුවේ දාරය වටා තැවරී ඇති මඩ දෙස බලන්න මිත්‍රයා.එවැනි රතු දුඹුරු පැහැ,කැට සහිත පස් ඇත්තේ කැළණියේයි"
මට සිද්ධිය පැහැදිලි විය.ඔහුටද පැහැදිලි කරවූවෙමි.
"මේක මගේ සපත්තු දෙක නෙවෙයි! "
එවර  ප්‍රසාරණය වූයේ ඔහුගේ කටය.
"හෙට වෙඩින් එකක්.ඒකට යන්න යාලුවෙක්ගෙන් ඉල්ලගතේ ,අද දවල් "
"ආ..ආ..ඒකත් එහෙමද ?"නවකතා දෙබස් නැත!.
"එතකොට අර ක්‍රිකට් ප්‍රැක්ටිස් කතාව?"මම කල දුටු කල වල ඉස්සෙමි.
"බලන්න ඔබේ වම් අතේ මැණික් කටුව වටා තිබෙන සුදුමැලි වී ඇති දාරය.මෙවැනි සළකුණක් ඇති විය හැක්කේ අත් වැසුම් පැළඳීමෙන් පමණයි. පාසල් ශිෂ්‍යයෙක් අත් වැසුම් පැළදිය හැක්කේ කුමකටද?නිසැකයෙන්ම ක්‍රිකට් ක්‍රීඩාවේදී විය යුතුයි "
මම කිසිත් නොකියා දකුණු අතද ඔහුට දිගු කළෙමි.එහි මැණික් කටුවේ එවැනි සළකුණක් නොවීය.
"ඔය දාරයක් ආවේ කාලයක් බ්‍රෙස්ලට් එකක් දාගෙන ඉඳලා.ඒක අද උදේ යාලුවෙක් ඉල්ලගත්තා අර වෙඩින් එකටම යන්න, "
අහම්බෙන් IPL තරඟයක මහේල ජයවර්ධන තැඹිලි පාට ඇඳුමකින් සිටිනු දැක "දැන් ලංකා ටීම් එකේ යුනිෆෝම් වෙනස් කරලාද "කියා ඇසූ මට මොන ක්‍රිකට්ද යන කරුණ පවිත්‍ර හෝම්ස්ගේ නිරීක්ෂණවල අසු නොවීය !!  

Share:

May 17, 2011

ආයෙමත් හෝම්ස්(එක )--ඔහු

( මේක සමහර විට කෙටි කතාවක් වගේ එකක් විදියට සළකන්න පුලුවන් වෙයි.නැත්නම් තවත් අනීවාරතේ වැඩක්.)
 දවසේ වීරයා බවට පත්වී සිටියේ ඔහුය. කිසිවෙකු එතෙක් මෙතෙක් දැක නැති තාලයේ අමුතුම චරිතයකි.කා සමඟවත් කතා බහක් නැත.වටපිටද නොබලයි.එක්කෝ අහසත් පොළවත් ගැට ගැසීමට හැකි ක්‍රම විශ්ලේෂනය කරමිනි.නැතිනම් යහනාවක් බවට පෙරළාගන්නා පුටුවේ දිගා වී කකුල් දෙකම පොළොවට සමාන්තර කර බවුන් වඩමිනි. මෙවැනි අසාහය චරිතයකට පණ පොවන්නේ වෙන කවරෙකුවත් නොව අප සමඟ එක පාසලේ එක පන්තියක "ඉගෙනීමට " පැමිණි අලුත්ම සාමාජිකයාය. 
            ඔහු සිහින්ය,උසය.තට්ටය පෙනෙන නොපෙනෙන දුරට කැපූ කොණ්ඩයකි.පෙනුම ෂාරුක්ටවත්,බේකම්ටවත් අඩුම ගානේ මර්වින් සිල්වාටවත් සමාන කිරීමට උත්සහ කොට නැත.ඇත්තේ  ලංකාවේ පළමු තේ පැළය හිටවූ යුගයේ පුද්ගලයෙකුගේ පෙනුමය,විලාසිතාය.කොටින්ම කියතොත් ඔහු වෙන කවරෙකුවත් නොව ඔහුමය.
           ප්‍රසිද්ධ නමක් නැති  ඔහුට, "ඔහු" යන සර්ව නාම පදයෙන් ආමන්ත්‍රණය කිරීම අපේ පන්තියේ සිටි අයට ටික දවසකින් එපා වූ සේම ,මෙම "කතාවේ""රචකයා" වන මටද දැන් එය එපා වී ඇත. ප්‍රශ්නයට පිළියමක් වශයෙන් අලුත් නාමකරණයක් යෝජනා විය. "හෝම්ස් "....කිසිම අර්ථයක් ,සාරයක් නැති නමකි (අනීවාරතේ නමකි).ඉංග්‍රීසියෙන් "හෝම්" යන වචනයෙන් "ගෙයක් "ගැන කියවෙන වගත් "හෝම්ස්" යනු එහි බහු වචනය බවත් පැවසීමට ශබ්ද කෝෂයක් පෙරළීමට අවශ්‍ය නැත.
         නමුත් මගේ මිතුරන්ගේ මතය වුයේ වෙනමම එකකි.එක්දහස් අටසිය ගණන්වල "හෝම්ස් "නමින් රහස් පරීක්ෂකයෙක් සිටියේලු !.ඇත්තටම නොසිටියේලු.එය මන:කල්පිත චරිතයකි."ඔහුගේ "පෙනුමත් හැසිරීමත් හෝම්ස්ට සමානලු ..ලු....ලු....ලු...   
      ටීක දිනකින් "හෝම්ස්"ගේ ඇත්ත නම හෙළිදරවු විය.එවිට ඇත්ත නමත්,කලින් නමත් එකතු වී අලුත්ම නාමකරණයක් යෝජනා විය."පවිත්‍ර හෝම්ස්"!!.ගැමි ව්‍යවහාරයේ එළ හරකාත් මී හරකාත් එකතු වෙනවාය කියන්නේ මෙවැනි දේටය."පවිත්‍ර හෝම්ස්? ".බැංකුවක නිවාස ණයක්?
 
         මේ නමට ඔහුගේ (හෝම්ස්,පවිත්‍ර හෝම්ස් ...)ප්‍රතිචාර කෙබඳුදැයි බැලීමට අපි පරීක්ෂණයක් සැළසුම් කළෙමු.පරීක්ෂණයෙන් ලැබුනේ කිසිසේත්ම අපේක්ෂා නොකළ ආකාරයේ ප්‍රථිපලය.ඇපල් ගෙඩියක් බිම වැටෙනවා දුටු නිවුටන් සිතූ මනස්ගාත විශ්වාස කළ හැකිය.අකුණු ගසන වෙලාවක සරුංගල් යැවූ ඔහු (නම මතක නැත ) කිවූ දේ විශ්වාස කළ හැකිය.නමුත් මොහු ? .හෝම්ස් යන නම කන් බෙරය ස්පර්ශ කළ මොහොතේම "පවිත්‍ර හෝම්ස් " ගැහැණු ළමයෙක් වැඩිවියට එළඹෙන්නාක් මෙන් විකසිත විය. දෑස පොපියන්නට විය.කම්මුල් රතු විය.අපි පළමු වතාවට ඔහුගේ දත් දෙපළ දුටුවෙමු!!.

                 මතු සම්බන්ධයි (නමුත් දෙවන කොටස ගැන වැඩි බලාපොරොත්තුවක් නැත )
                       (සැ.යු ,ලංකාවේ පළමු තේ පැළය සිටවූයේ 1867 දීය )
Share: